នៅក្នុងការផ្លាស់ប្តូរដ៏សំខាន់មួយក្នុងការជំរុញការអភិវឌ្ឍន៍នៅទូទាំងតំបន់អាស៊ីប៉ាស៊ីហ្វិក ធនាគារអភិវឌ្ឍន៍អាស៊ី (ADB) បានបង្ហាញផែនការបង្កើនសមត្ថភាពហិរញ្ញប្បទានប្រចាំឆ្នាំរបស់ខ្លួនពី ២៤ពាន់លានដុល្លារក្នុងឆ្នាំ២០២៤ ដល់ ៣៦ពាន់លានដុល្លារនៅឆ្នាំ២០៣៤ ។ ការពង្រីក ៥០% នេះមានគោលបំណងលើកកម្ពស់សមត្ថភាពរបស់ ADB ក្នុងការដោះស្រាយបញ្ហាប្រឈមនានាក្នុងតំបន់ និងជំរុញកំណើនប្រកបដោយចីរភាព។

នៅក្នុងសេចក្តីប្រកាសព័ត៌មាននៅថ្ងៃទី១៨ ខែកុម្ភៈ ឆ្នាំ២០២៥ ប្រធាន ADB លោក Masatsugu Asakawa មានប្រសាសន៍ថា ផែនការប្រើប្រាស់មូលធន (CUP) នេះនឹងពង្រឹងឥទ្ធិពលការងាររបស់ ADB ក្នុងការលើកកម្ពស់ជីវភាពរស់នៅរបស់ប្រជាពលរដ្ឋ និងការពារភពផែនដី។ ផែនការនេះអនុញ្ញាតឱ្យការវិនិយោគជាយុទ្ធសាស្រ្តដើម្បីដោះស្រាយបញ្ហាប្រឈមដ៏ស្មុគស្មាញ និងលើកកម្ពស់គុណភាពប្រតិបត្តិការ និងប្រសិទ្ធភាពនៅក្នុងតំបន់។

ADB មានគោលបំណងពង្រឹងការផ្តល់ប្រាក់កម្ចីសម្បទាននេះ ដើម្បីបង្កើនមូលនិធិអភិវឌ្ឍន៍អាស៊ី និងជំរុញយ៉ាងខ្លាំងនូវការសន្យាផ្តល់ប្រាក់កម្ចីរបស់ខ្លួនក្នុងរយៈពេលពីរទៅបីឆ្នាំខាងមុខ។ ប្រតិបត្តិការមិនមែនអធិបតេយ្យភាពនេះ ត្រូវបានគេរំពឹងថានឹងកើនឡើងពី ២០% ទៅ ២៧% ក្នុងទសវត្សរ៍ក្រោយ ខណៈពេលដែលប្រតិបត្តិការអធិបតេយ្យភាពនេះក៏នឹងពង្រីកល្បឿនអភិវឌ្ឍន៍ជាមធ្យមបន្ថែមទៀតផងដែរ។

ដើម្បីសម្រេចបាននូវគោលដៅឆ្នាំ២០៣០ របស់ខ្លួន ADB នឹងក៏បានបង្កើនចំណែកនៃហិរញ្ញប្បទានអាកាសធាតុដល់ ៥០% នៃការប្តេជ្ញាចិត្តសរុប ដែលនឹងឈានដល់ ១៣ពាន់លានដុល្លារក្នុងការផ្តល់ហិរញ្ញប្បទានពីវិស័យឯកជនពីការផ្តល់មូលនិធិរបស់ ADB និងការប្រមូលផ្តុំដោយផ្ទាល់នៅឆ្នាំ២០៣០។

នៅពេលដែល ADB ត្រៀមលក្ខណៈសម្រាប់គោលដៅដ៏មានមហិច្ឆតារបស់ខ្លួនរួចស្រេចនេះ ភាគីពាក់ព័ន្ធទូទាំងតំបន់កំពុងឃ្លាំមើលយ៉ាងដិតដល់ពីរបៀបដែលការផ្លាស់ប្តូរទាំងនេះនឹងមានឥទ្ធិពលលើការអភិវឌ្ឍន៍សេដ្ឋកិច្ច និរន្តរភាពបរិស្ថាន និងគុណភាពជីវិតទាំងមូលសម្រាប់មនុស្សរាប់លាននាក់នៅអាស៊ីប៉ាស៊ីហ្វិក។

The post ADB ប្រកាស​ពង្រីកទំហំហិរញ្ញប្បទានរបស់ខ្លួនដល់ $៣៦ពាន់លាន ដើម្បី​ដោះស្រាយ​បញ្ហា​ប្រឈម​នៅអាស៊ីប៉ាស៊ីហ្វិក appeared first on Construction & Property News.

ការបង្កកជំនួយ USAID ភ្លាមៗក្រោមរដ្ឋបាលអាមេរិកថ្មីរបស់លោកប្រធានាធិបតី ដូណាល់ ត្រាំ បានបញ្ឈប់គម្រោងហេដ្ឋារចនាសម្ព័ន្ធ និងការអភិវឌ្ឍន៍សំខាន់ៗនៅទូទាំងអាស៊ីអាគ្នេយ៍ ហើយ នយោបាយដកថយនេះ បានបន្សល់ទុកចន្លោះប្រហោងឥទ្ធិពលផ្នែកភូមិសាស្ត្រនយោបាយ ដែលនឹង ក្លាយឪកាសដ៏ល្អសម្រាប់ប្រទេសចិនចូលមកបំពេញជំនួស។ ជំនួយបរទេសជិត ៦៨ ពាន់លានដុល្លារ ដែលសហរដ្ឋអាមេរិក ធ្លាប់បានជួយបន្តពីឆ្នាំ ២០២៣ ដល់ប្រទេសនៃអនុតំបន់ទន្លេមេគង្គក្នុងមាន ប្រទេសកម្ពុជាផង ឥឡូវនេះត្រូវបានកាត់ផ្តាច់ ហើយការសម្រេចចិត្តនេះ បានប៉ះពាល់ ដល់មនុស្សរាប់ លាននាក់ដែលកំពុងពឹងផ្អែកលើកម្មវិធីទាំងនេះ យោងតាមសារៈព័ត៌មាន scmp.com រាយការណ៍កាលពីថ្ងៃទី ២៨ ខែមករា ឆ្នាំ២០២៥។

ការសម្រេចចិត្តនេះ ផ្តើមចេញពីគោលនយោបាយ “អាមេរិកមុនគេ America First” របស់លោក ដូណាល់ ត្រាំ និងគម្រោងមូលនិធិមត៌ក ២០២៥ ( Heritage Foundation’s 2025) បានធ្វើឱ្យមាន ការភ្ញាក់ផ្អើលយ៉ាងខ្លាំងក្នុងចំណោមមហាជន និងអ្នកជំនាញក្នុងតំបន់ ដោយក្រុមអ្នកស្រាវជ្រាវ បានព្រមានអំពីផលវិបាកសេដ្ឋកិច្ច និងនយោបាយរយៈពេលវែង។ យោងតាមលោក Grace Stanhope សហការីស្រាវជ្រាវរបស់វិទ្យាស្ថាន Lowy បាននិយាយថា “ការបង្កកជំនួយនេះ បង្កបញ្ហាប្រឈមយ៉ាង ធ្ងន់ធ្ងរសម្រាប់ប្រជាជាតិជាច្រើន នៅក្នុងតំបន់ ប៉ុន្តែជាពិសេសសម្រាប់ប្រទេសកំពុងអភិវឌ្ឃដូចជាកម្ពុជា ឡាវ និងមីយ៉ាន់ម៉ា”។

ចាប់តាំងបានបង្កើតឡើងក្នុងឆ្នាំ ១៩៦១ ដោយលោកប្រធានាធិបតី John F. Kennedy មកម្ល៉េះ ទីភ្នាក់ងារ USAID បានដើរតួយ៉ាងសំខាន់ក្នុងការជំរុញការអភិវឌ្ឍប្រកបដោយចីរភាព ការកាត់បន្ថយ ភាពក្រីក្រ និងស្ថិរភាពសេដ្ឋកិច្ចនៅក្នុងប្រទេសកំពុងអភិវឌ្ឍ។ ទោះជាបានបន្តមកអស់ជិតមួយសតវត្ស មកហើយក៏ដោយ ការកាត់បន្ថយថវិកាយ៉ាងទាន់ហន់ និងភ្លាមៗបែបនេះ របស់រដ្ឋបាលលោក ប្រធានាធិបតី ដូណាល់ ត្រាំ បានធ្វើឱ្យកិច្ចខិតខំប្រឹងប្រែងមនុស្សធម៌របស់សហរដ្ឋអាមេរិកចុះខ្សោយ។

ការផ្អាកជំនួយនេះ បាននាំឱ្យមាន ការបិទមណ្ឌលថែទាំសុខភាពសម្រាប់ជនភៀសខ្លួននៅតាមព្រំដែនថៃ-មីយ៉ាន់ម៉ារួចមកហើយ ហើយជាលទ្ធផល សេវាថែទាំសុខភាពសំខាន់ៗនៅតាមទីកន្លែងជាច្រើន ត្រូវបានបញ្ឈប់លែង មានលទ្ធភាពបន្តប្រតិបត្តិការ។

សម្រាប់ប្រទេសកម្ពុជា ក្រោយពេលបិទបញ្ឈប់បេសកកម្មទីភ្នាក់ងារ USAID អស់ទៅ សេវាសំខាន់ៗ នៅក្នុងប្រទេសកម្ពុជា រួមទាំងការថែទាំសុខភាព និងការអប់រំ ក៏កំពុងប្រឈម នឹងការរំខានយ៉ាងខ្លាំងផងដែរ។ ទន្ទឹមនឹងនេះ ប្រទេសចិនកំពុងផ្តល់ទុនជំនួសលើការដកថយ របស់អាមេរិកនេះ តាមរយៈគំនិតផ្តួចផ្តើមខ្សែក្រវាត់ និងផ្លូវ (BRI) ដែលជាកម្មវិធីវិនិយោគហេដ្ឋា រចនាសម្ព័ន្ធដ៏ធំទូលាយដែលផ្លាស់ប្តូរទិដ្ឋភាពសេដ្ឋកិច្ចរបស់កម្ពុជា។

ឧទាហរណ៍សំខាន់មួយគឺគម្រោងព្រែកជីកហ្វូណនតេជោតម្លៃ ១,៧ ពាន់លានដុល្លារ ដែលនឹងតភ្ជាប់ រាជធានីភ្នំពេញទៅឈូងសមុទ្រថៃ ដោយវាងផ្លូវលែងឆ្លងកាត់ដីសណ្ដមេគង្គរបស់ប្រទេសវៀតណាម។ គម្រោងយុទ្ធសាស្ត្រនេះ ធ្វើឱ្យទំនាក់ទំនងសេដ្ឋកិច្ចរបស់ចិនកាន់តែស៊ីជម្រៅជាមួយកម្ពុជា ដែលជា សម្ព័ន្ធមិត្តជិតស្និទ្ធបំផុតមួយនៅក្នុងតំបន់អាស៊ីអាគ្នេយ៍ និងពង្រឹងភាពលេចធ្លោរបស់ទីក្រុងប៉េកាំងក្នុង ពាណិជ្ជកម្មក្នុងតំបន់។ ការសាងសង់ព្រែកជីកនេះ ស្របតាមមហិច្ឆតាដ៏ទូលំទូលាយរបស់ប្រទេសចិន ដោយផ្តល់ឱ្យមហាអំណាចកំពុងមានប្រៀបឥទ្ធិពលភូមិសាស្ត្រនយោបាយនេះ នូវការគ្រប់គ្រងលើផ្លូវ ពាណិជ្ជកម្មសំខាន់ៗ និងការបង្កើនការពឹងផ្អែករបស់កម្ពុជាលើកិច្ចព្រមព្រៀងហិរញ្ញប្បទាន និងការវិនិយោគដែលគាំទ្រដោយចិន។

ភាគីពាក់ព័ន្ធក្នុងតំបន់ កំពុងបង្កើនការព្រួយបារម្ភអំពីផលប៉ះពាល់កាន់តែទូលំទូលាយចេញពីការ ដកឥទ្ធិពលអាមេរិកនេះ។ បើតាមលោក ហេង គឹមហុង ប្រធានបណ្តាញយុវជនកម្ពុជា បានលើកឡើងពីផលប៉ះពាល់យ៉ាងទូលំទូលាយលើអង្គការមិនមែនរដ្ឋាភិបាលថា “ជាការពិតណាស់ ការបង្កកមូលនិធិបានប៉ះពាល់ដល់សកម្មភាពរបស់អង្គការមិនមែនរដ្ឋាភិបាល ដើម្បីផ្តល់សិទ្ធិ អំណាចដល់យុវជន និងសហគមន៍ក្នុងការលើកកម្ពស់សិទ្ធិមនុស្ស និងការពារធនធានធម្មជាតិ។

អ្នកកាប់ឈើខុសច្បាប់នឹងឆ្លៀតឱកាសនេះ ចូលកាប់ព្រៃឈើនៅក្នុងតំបន់ការពារ។ អង្គការមិនមែន រដ្ឋាភិបាលមួយចំនួននៅកម្ពុជា រងផលប៉ះពាល់រហូតដល់ ពី៥០ ទៅ១០០ ភាគរយនៃពីប្រតិបត្តិការរបស់ពួកគេ។ នេះគឺជាបញ្ហាដ៏ធំមួយ។”

បើគ្មានការបន្តការចូលរួមរបស់សហរដ្ឋអាមេរិកទេ ការពង្រីកឥទ្ធិពលគ្មានដែនកំណត់ របស់ចិននៅក្នុង ប្រទេសកម្ពុជា នឹងពង្រឹងការក្តាប់សេដ្ឋកិច្ចរបស់ខ្លួននៅក្នុងតំបន់ ដោយកំណត់គោលនយោបាយ ដែលអនុគ្រោះដល់ផលប្រយោជន៍ជាយុទ្ធសាស្រ្តរបស់ទីក្រុងប៉េកាំង ជំនួសមុខឲ្យគំរូអភិបាលកិច្ច របស់លោកខាងលិច។

ផលប៉ះពាល់កាន់តែទូលំទូលាយនៃការដកខ្លួនរបស់ USAID មានលើសពីតម្រូវការផ្នែកហេដ្ឋារចនាសម្ព័ន្ធ និងមនុស្សធម៌របស់កម្ពុជាទៅទៀត។ អវត្ដមាននៃយន្តការអំណាចទន់របស់សហរដ្ឋអាមេរិក អាច អនុញ្ញាតឱ្យចិនកំណត់ច្បាប់នៃការចូលរួមនៅក្នុងតំបន់អាស៊ីអាគ្នេយ៍។ ឥទ្ធិពលរបស់ទីក្រុងប៉េកាំង ដែលបានចាក់ឫសនៅក្នុង គម្រោងហេដ្ឋារចនាសម្ព័ន្ធដែលផ្តល់ហិរញ្ញប្បទានដោយបំណុល និងកិច្ចព្រម ព្រៀងវិនិយោគដោយគ្មានលក្ខខណ្ឌ កំពុងផ្លាស់ប្តូរសម្ព័ន្ធភាពក្នុងតំបន់។

នៅពេលដែលជំនួយរបស់សហរដ្ឋអាមេរិករលាយបាត់ ប្រទេសក្នុងតំបន់មេគង្គនៅសល់ជម្រើសតិច ជាងមុន ដោយពង្រឹងឥទ្ធិពលរបស់ចិនក្នុងកិច្ចព្រមព្រៀងពាណិជ្ជកម្ម គោលនយោបាយសន្តិសុខ និងក្របខ័ណ្ឌអភិវឌ្ឍន៍សេដ្ឋកិច្ច។

កត្តាឥទ្ធិពលភូមិសាស្ត្រនយោបាយនៅអាស៊ីអាគ្នេយ៍ គូសបញ្ជាក់អំពីតម្រូវការបន្ទាន់សម្រាប់ការចូលរួម ជាថ្មីរបស់សហរដ្ឋអាមេរិកក្នុងការអភិវឌ្ឍន៍ក្នុងតំបន់។ បើគ្មានវិធានការតបតទេ ការត្រួតត្រាជាយុទ្ធសាស្ត្ររបស់ចិននឹងបន្តពង្រីក ដោយកាត់បន្ថយឥទ្ធិពលរបស់សហរដ្ឋអាមេរិក ហើយទុកឱ្យកម្ពុជា និងប្រទេសជិតខាងពឹងផ្អែកកាន់តែខ្លាំងឡើងលើរបៀបវារៈសេដ្ឋកិច្ច និងនយោបាយរបស់ទីក្រុងប៉េកាំង៕

The post ការដកខ្លួនរបស់ទីភ្នាក់ងារ USAID ត្រួសត្រាយផ្លូវសម្រាប់ការពង្រីកឥទ្ធិពលរបស់ចិននៅកម្ពុជា និងអាស៊ាន appeared first on Construction & Property News.

ទំហំពាណិជ្ជកម្មតម្លៃប្រមាណ ៧២២ពាន់លានដុល្លាររ វាងចិន និងអាស៊ាន កំពុងប្រឈមមុខនឹងសម្ពាធដែលមិនធ្លាប់មានពីមុនមក ជាពិសេស គឺបញ្ហាអតិផរណា និងការកើនឡើងនៃចំនួនយុវជនអត់ការងារធ្វើ។ ជាមួយគ្នានេះ វិស័យអចលនទ្រព្យរបស់ប្រទេសចិនដែលរួមចំណែកច្រើនជាង ២៥% នៃផលិតផលក្នុងស្រុកសរុបរបស់ខ្លួន និងស្មើនឹងប្រហែល ៧០% នៃទ្រព្យសម្បត្តិឯកជនរបស់ប្រជាពលរដ្ឋចិន បង្ហាញសញ្ញារងគ្រោះធ្ងន់ធ្ងរ ចំពេលមានការធ្លាក់ចុះទំនុកចិត្តពីអ្នកប្រើប្រាស់ ដែលបានឈានដល់កម្រិតទាបបំផុតរហូតដល់ ៨៦% ក្នុង ខែកក្កដា ឆ្នាំ ២០២៤ នេះបើយោងតាមការរាយការណ៍របស់ Evrimagaci.org នៅថ្ងៃទី៣១  ខែមករា ឆ្នាំ ២០២៥។

ទីផ្សារអចលនៈទ្រព្យអាស៊ីអាគ្នេយ៍ កំពុងជួបប្រទះនឹងផលប៉ះពាល់យ៉ាងខ្លាំងពីបញ្ហាប្រឈមសេដ្ឋកិច្ចរបស់ប្រទេសចិន ដោយគម្រោងហេដ្ឋារចនាសម្ព័ន្ធប្រឈមមុខនឹងការត្រួតពិនិត្យជាពិសេស។ ប្រភពដដែលក៏បានលើកឡើងពីអនាគតមិនប្រាកដប្រជារបស់គម្រោងព្រែកជីក Funan Techo ដ៏មានមហិច្ឆតាក្នុងតម្លៃ ១,៧ ពាន់លានដុល្លារ បង្ហាញពីការព្រួយបារម្ភកាន់តែខ្លាំងអំពីគំនិតផ្តួចផ្តើមអភិវឌ្ឍន៍ដែលគាំទ្រដោយចិននៅទូទាំងតំបន់អាស៊ីអាគ្នេយ៍។ អ្នកវិនិយោគ និងអ្នកអភិវឌ្ឍន៍អចលនទ្រព្យ កំពុងតាមដានយ៉ាងដិតដល់នូវការផ្លាស់ប្តូរទាំងនេះ ស្របពេលជាមួយគ្នានោះ ពួកគេបង្ហាញពីសក្តានុពលនៃការផ្លាស់ប្តូរនៃលំហូរវិនិយោគ ដែលធ្លាប់មាននៅក្នុងទិដ្ឋភាពអចលនទ្រព្យរបស់អាស៊ានកន្លងមក។

ផលប៉ះពាល់លើទីផ្សារអចលនទ្រព្យ ដែលពឹងផ្អែកលើវិស័យទេសចរណ៍ គឺមានសភាពធ្ងន់ធ្ងរខ្លាំងជាងគេ។ ប្រទេសថៃដែលវិស័យទេសចរណ៍ បានរួមចំណែកប្រមាណ ១២% ដល់ GDP របស់ខ្លួន ក្នុងឆ្នាំ ២០២៣ ឃើញថាចំនួនអ្នកទេសចរចិនបានធ្លាក់ចុះពី ១២ លាននាក់មុនសម័យកូវីដ មកត្រឹមតែ ៧-៨ លាននាក់នាពេលថ្មីៗនេះ។ ការធ្លាក់ចុះយ៉ាងខ្លាំងនេះបានជះឥទ្ធិពលដោយផ្ទាល់ទៅលើអត្រាកាន់កាប់សណ្ឋាគារ តម្រូវការកន្លែងលក់រាយ និងតម្លៃអចលនទ្រព្យនៅក្នុងគោលដៅទេសចរណ៍សំខាន់ៗ។

គំនិតផ្តួចផ្តើមខ្សែក្រវាត់ និងផ្លូវ (BRI) ដែលធ្លាប់ជាកត្តាជំរុញដ៏សំខាន់នៃការអភិវឌ្ឍន៍អចលនទ្រព្យនៅទូទាំងអាស៊ីអាគ្នេយ៍ ក៏បានប្រឈមមុខនឹងការត្រួតពិនិត្យថ្មី ខណៈដែលការព្រួយបារម្ភអំពីនិរន្តរភាពបំណុល ក៏មានការកើនឡើង។ តួយ៉ាងដូចជា ស្ថានភាពរបស់ប្រទេសឡាវ អាចរាប់បានថាជាឧទាហរណ៍គួរប្រុងប្រយ័ត្នមួយ ដោយជិតពាក់កណ្តាលនៃបំណុលបរទេសចំនួន ១០,៥ ពាន់លានដុល្លាររបស់ខ្លួន គឺជំពាក់ចិន រួមទាំងការវិនិយោគអចលនទ្រព្យ និងហេដ្ឋារចនាសម្ព័ន្ធសំខាន់ៗ ដូចជាគម្រោងផ្លូវដែកល្បឿនលឿនចំនួន ៦ ពាន់លានដុល្លារ ជាដើម។

ទីផ្សារអចលនទ្រព្យក្នុងតំបន់អាស៊ាន កំពុងសម្របខ្លួនទៅនឹងតថភាពសេដ្ឋកិច្ចថ្មីទាំងនេះ ហើយជាការឆ្លើយតប គឺសង្កេតឃើញប្រទេសអាស៊ានមួយចំនួន បានធ្វើពិពិធកម្មប្រភពវិនិយោគរបស់ពួកគេ។ ជាក់ស្តែង ចំណុចស្នូលជាយុទ្ធសាស្ត្ររបស់វៀតណាម គឺបានបង្ហាញច្បាស់ពីកិច្ចខិតខំប្រឹងប្រែងរបស់ខ្លួនក្នុងការបង្កើនទំនាក់ទំនងរបស់ខ្លួនជាមួយសហរដ្ឋអាមេរិក និងឈានរហូតសម្រេចបាននូវភាពជាដៃគូយុទ្ធសាស្ត្រគ្រប់ជ្រុងជ្រោយ។ យុទ្ធសាស្ត្រនេះ តំណាងឱ្យនិន្នាការកាន់តែទូលំទូលាយនៃបណ្តាប្រទេសអាស៊ានដែលកំពុងស្វែងរកការកាត់បន្ថយការពឹងផ្អែកលើដើមទុនរបស់ចិនក្នុងវិស័យអចលនទ្រព្យរបស់ពួកគេ។

ឥណ្ឌូណេស៊ី ដែលជាប្រទេសសេដ្ឋកិច្ចធំជាងគេក្នុងតំបន់ ប្រឈមមុខនឹងបញ្ហាប្រឈមពីរនៅក្នុងទីផ្សារអចលនទ្រព្យរបស់ខ្លួន ដោយសារការកាត់បន្ថយការនាំចូលរបស់ចិនប៉ះពាល់ដល់កំណើនសេដ្ឋកិច្ចទាំងមូល ខណៈដែលការកើនឡើងនៃការប្រកួតប្រជែងសម្រាប់ពាណិជ្ជកម្មប៉ះពាល់ដល់លំហូរវិនិយោគ។ ចំពោះមុខបញ្ហានេះ អ្នកអភិវឌ្ឍន៍ក្នុងស្រុក និងអ្នកវិនិយោគអចលនទ្រព្យកំពុងស្វែងរកប្រភពមូលនិធិជំនួស និងឱកាសទីផ្សារយ៉ាងសកម្ម ដើម្បីឆ្លើយតបទៅនឹងសក្ដានុពលនៃការផ្លាស់ប្តូរទាំងនេះ។

ទោះបីជាមានបញ្ហាប្រឈមទាំងនេះក៏ដោយ អ្នកវិភាគទីផ្សារកត់សម្គាល់ថា ការកាត់ផ្តាច់ទាំងស្រុងពីការវិនិយោគរបស់ចិននៅក្នុងវិស័យអចលនទ្រព្យអាស៊ាន នៅតែជារឿងមិនទំនងជានឹងអាចធ្វើបាន។ ការសិក្សាស្ទាបស្ទង់មតិមួយនៅទូទាំងអាស៊ីអាគ្នេយ៍បង្ហាញថា ប្រទេសជាសមាជិកភាគច្រើនបន្តចាត់ទុកប្រទេសចិនជាដៃគូសេដ្ឋកិច្ចចម្បងរបស់ពួកគេ ជាពិសេសក្នុងការអភិវឌ្ឍន៍អចលនទ្រព្យ និងគម្រោងហេដ្ឋារចនាសម្ព័ន្ធ។ ទំនាក់ទំនងយូរអង្វែងនេះ បង្ហាញពីតម្រូវការចាំបាច់សម្រាប់ប្រទេសអាស៊ាននីមួយៗ ក្នុងការសម្របខ្លួនជាយុទ្ធសាស្រ្តជាជាងការរៀបចំឡើងវិញនូវទីផ្សារ។

វិស័យអចលនៈទ្រព្យរបស់ម៉ាឡេស៊ី បង្ហាញពីយុទ្ធសាស្ត្រក្នុងការចេះរក្សាបាននូវលំនឹងទីផ្សារដ៏ល្អ សម្រាប់ប្រជាជាតិអាស៊ានយកជាគំរូ ព្រោះម៉ាឡេស៊ីចេះបត់ទាន់របត់និន្នាការពិភពលោក ស្របពេលជាមួយគ្នានោះចេះរក្សាបាននូវលក្ខខណ្ឌវិនិយោគដ៏ទាក់ទាញសម្រាប់អ្នកវិនិយោគអន្តរជាតិចម្រុះ។ រឿងល្អសម្រាប់ម៉ាឡេស៊ី គឺការត្រលប់មកវិញដ៏មានសក្តានុពលនៃពាណិជ្ជកម្មទ្វេភាគីដ៏រឹងមាំនៅក្រោមរដ្ឋបាលថ្មីរបស់សហរដ្ឋអាមេរិក ដែលបានផ្តល់ក្តីសង្ឃឹមសម្រាប់ការបង្កើនការធ្វើពិពិធកម្មការវិនិយោគ ទោះបីជាឥទ្ធិពលរបស់ចិននៅក្នុងទីផ្សារអចលនទ្រព្យក្នុងតំបន់នៅតែសំខាន់ក៏ដោយ។

សម្រាប់មួយរយៈពេលវែងទៅខាងមុខ ទីផ្សារអចលនទ្រព្យរបស់អាស៊ាន ត្រូវប្រឈមនឹងការរៀបចំយុទ្ធសាស្ត្រឡើងវិញ។ ខណៈពេលដែលការរក្សាទំនាក់ទំនងដែលមានស្រាប់ជាមួយវិនិយោគិនចិននៅតែជារឿងមិនអាចចោលបាន អ្នកអភិវឌ្ឍន៍ និងក្រុមហ៊ុនអចលនទ្រព្យកំពុងស្វែងរកភាពជាដៃគូថ្មី និងប្រភពមូលនិធិកាន់តែច្រើនឡើងថែមទៀត ដើម្បីធានាបាននូវកំណើនប្រកបដោយចីរភាព ស្ថេរភាព និងភាពធន់ នៅក្នុងទិដ្ឋភាពសេដ្ឋកិច្ចដែលកំពុងវិវត្ត៕

The post សេដ្ឋកិច្ច​ចិនជួបវិបត្តិថ្មី ជះឥទ្ធិពលដល់ទីផ្សារ​អចលន​ទ្រព្យ​និងគម្រោងអភិវឌ្ឍន៍សំខាន់ៗនៅអាស៊ាន appeared first on Construction & Property News.

ទិដ្ឋភាពអចលនទ្រព្យអាស៊ីអាគ្នេយ៍ កំពុងជួបប្រទះការផ្លាស់ប្តូរដ៏ធំមួយ ដោយសារអចលនទ្រព្យ ចាប់ផ្តើមកើនតម្លៃឡើងវិញ។ ជាក់ស្តែងអចលនទ្រព្យកម្រិត A នៅកណ្តាលទីក្រុងសិង្ហបុរី កើនតម្លៃដល់ទៅ ២០.០០០ដុល្លារ ក្នុងមួយម៉ែត្រការ៉េ ខណៈដែលទីផ្សារដែលកំពុងរីកចម្រើនដូចជា នៅកម្ពុជា មានតម្លៃទាបបំផុតត្រឹម ១.០០០ ដុល្លារ ក្នុងមួយម៉ែត្រការ៉េ។ នេះបើយោងតាមរបាយការណ៍ ស្តីពីបច្ចុប្បន្នភាពទីផ្សារ អចលនទ្រព្យក្នុងតំបន់ និងការព្យាករទីផ្សារ នៅទូទាំងប្រទេសអាស៊ីអាគ្នេយ៍សំខាន់ៗចំនួន ០៥ ចេញផ្សាយដោយ Investasian.com កាលពីដើមខែមករា ឆ្នាំ ២០២៥។

វិស័យអចលនទ្រព្យក្នុងតំបន់បង្ហាញនូវឱកាសវិនិយោគចម្រុះ ដែលផ្តល់អោយទីផ្សារនីមួយៗនូវ អត្ថប្រយោជន៍ប្លែកៗគ្នា។ នៅក្នុងរាជធានីភ្នំពេញ ដែលកំពុងមានសកម្មភាពនគរូបនីយកម្ម យ៉ាងឆាប់រហ័ស ជំរុញឱ្យមានតម្រូវការអចលនទ្រព្យ អ្នកវិនិយោគអាចទិញខុនដូលំដាប់កំពូលក្នុងតម្លៃ ២.០០០ដុល្លារ ក្នុងមួយម៉ែត្រការ៉េ។ ច្បាប់កម្មសិទ្ធិបរទេសរបស់កម្ពុជា អនុញ្ញាតឱ្យអ្នកវិនិយោគ អន្តរជាតិកាន់កាប់រហូតដល់ ៧០% នៃខុនដូ ដែលធ្វើឱ្យវាក្លាយជាចំណុចទាក់ទាញ ដ៏សំខាន់សម្រាប់វិនិយោគិន មូលធនពិភពលោកដែលកំពុង ស្វែងរកទីផ្សារដែលកំពុងរីកចម្រើន។

ចំណែកឯទីផ្សារអចលនទ្រព្យរបស់ប្រទេសម៉ាឡេស៊ី ក៏មានរឿង គួរឱ្យទាក់ទាញដូចគ្នា ជាពិសេស នៅទីក្រុងគូឡាឡាំពួ ដែលជាមជ្ឈមណ្ឌលខុនដូមានលក់ក្នុងតម្លៃ ៣.៥០០ដុល្លារ ក្នុងមួយម៉ែត្រការ៉េ។ រិតតែពិសេសទៀតនោះ គឺទីតាំងបច្ចុប្បន្នរបស់អគារ រីងហ្គីតម៉ាឡេស៊ី ដែលបានបង្កើត ជាច្រកពិសេសមួយសម្រាប់អ្នកវិនិយោគបរទេស ដោយអ្នកវិភាគទីផ្សារ បានព្យាករណ៍ ពីការឡើងថ្លៃរូបិយប័ណ្ណរបស់ម៉ាឡេស៊ី រហូតដល់ឆ្នាំ ២០២៥ ហើយអាចនឹងបន្តកើនឡើង នៅពេលខាងមុខទៀត។ ការរួមបញ្ចូលគ្នានៃតម្លៃចូលទីផ្សារដែលអាចទទួលយកបាន និងសក្តានុពលកំណើនតម្លៃរូបិយប័ណ្ណ ធ្វើឱ្យប្រទេសម៉ាឡេស៊ីជាគោលដៅវិនិយោគយុទ្ធសាស្ត្រ ប្រចាំតំបន់។

ចំណែកឯ​ទីផ្សារអចលនទ្រព្យហ្វីលីពីន នៅតែបន្តពង្រឹងជំហររបស់ខ្លួនជាគោលដៅវិនិយោគសំខាន់ ដែលជំរុញដោយវិស័យ ដំណើរការអាជីវកម្មដោយទាញធនធានពីខាងក្រៅ (BPO) ដ៏រឹងមាំរបស់ខ្លួន។ ខណៈដែលភាពជាម្ចាស់របស់ជនបរទេសលើកម្មសិទ្ធិអចលនទ្រព្យ ត្រូវបានកំណត់ត្រឹម ៤០% នៅក្នុងគម្រោងខុនដូ ភាគលាភប្រជាសាស្រ្តរបស់ប្រទេសនេះ ដែលកំណត់ដោយចំនួនប្រជាជនវ័យក្មេង ដែលកំពុងកើនឡើង – បន្តជំរុញតម្រូវការនៅទូទាំងផ្នែកលំនៅដ្ឋាន និងពាណិជ្ជកម្ម។ ជាពិសេសទីក្រុងធំៗដូចជា ម៉ានីល សេប៊ូ និងដាវ៉ាវ កំពុងជួបប្រទះនូវគន្លងកំណើនដ៏ខ្លាំង។

ក្រឡេកមកមើលទីផ្សារអចលនទ្រព្យរបស់ប្រទេសថៃ ជាពិសេស នៅទីក្រុងបាងកក ដែលជាកន្លែង សហគមន៍ជនបរទេស រក្សាភាពទាក់ទាញរបស់ខ្លួន ដែលកំពុងរីកចម្រើន ជំរុញឱ្យមានតម្រូវការលើផ្នែក អចលនទ្រព្យលំដាប់ប្រណីតខ្ពស់។ បើនិយាយពីក្របខណ្ឌកម្មសិទ្ធិបរទេសលើអចលនទ្រព្យរបស់ ប្រទេសនេះវិញ អនុញ្ញាតឱ្យអ្នកវិនិយោគអន្តរជាតិកាន់កាប់រហូតដល់ ៤៩% នៃគម្រោងអភិវឌ្ឍន៍ខុនដូ រួមជាមួយនឹងការមិនមានការរឹតបន្តឹងលើប្រតិបត្តិការផ្ទេរប្រាក់ចំណេញក្រៅប្រទេសចំពោះ ជនបរទេសដែលផ្ទេរប្រាក់ ត្រឡប់ទៅស្រុកវិញ បានធ្វើឱ្យប្រទេសថៃក្លាយជាទីផ្សារស្នូលសម្រាប់ ផលប័ត្រអចលនទ្រព្យពិភពលោក។

ចំពោះទីផ្សារអចលនទ្រព្យនៅសិង្ហបុរីកំពុងឈរជាទីផ្សារបុព្វលាភក្នុងតំបន់ ដែលនាំមុខគេខ្ពស់បំផុត ប៉ុន្តែជាទីផ្សារមានស្ថេរភាព និងតម្លាភាពដែលមិនអាចប្រៀបផ្ទឹមបាន។ ទីតាំងរបស់រដ្ឋបរទេសនេះ ជាទីក្រុងមជ្ឈមណ្ឌល ហិរញ្ញវត្ថុសកល ធានានូវតម្រូវការជាប់លាប់ពីជនបរទេសដែលកំពុងកើនឡើង ជាពិសេស នៅក្នុងផ្នែកផ្ទះបែបប្រណីត។ ខណៈពេលដែលថ្លៃទិញចូលនៅ មានកម្រិតខ្លាំង ក្របខណ្ឌបទប្បញ្ញត្តិដ៏រឹងមាំ និងទិន្នផលជួលដ៏រឹងមាំរបស់សិង្ហបុរី នៅតែបន្តទាក់ទាញអ្នកវិនិយោគ ដែលមិនចង់ប្រឈមនឹងហានិភ័យខ្ពស់ ដែលស្វែងរកផលចំណេញត្រឡប់មកវិញប្រកបដោយស្ថិរភាព។

ជារួម ទីផ្សារអចលនទ្រព្យរបស់ប្រទេសនីមួយៗ បង្ហាញពីបញ្ហាប្រឈមពិសេសរបស់ខ្លួន – រាប់ ចាប់តាំងពីកត្តាប្រឈមផ្នែកហេដ្ឋារចនាសម្ព័ន្ធដែលកំពុងអភិវឌ្ឍរបស់កម្ពុជា រហូតដល់ ការព្រួយបារម្ភ អំពីការផ្គត់ផ្គង់មិនគ្រប់គ្រាន់របស់ប្រទេសម៉ាឡេស៊ី និងភាពប្រកួតប្រជែងកើនឡើងច្រើនពេកនៅក្នុង ទីផ្សាររបស់ប្រទេសថៃ។ ទោះជាយ៉ាងណាក៏ដោយ ទិដ្ឋភាពរួមនៃទីផ្សារអលចនទ្រព្យទាំងនេះ ជាសមូហភាពតំណាងឱ្យភាពរឹងមាំនៃអចលនទ្រព្យអាស៊ីអាគ្នេយ៍ ដោយផ្តល់ជូនជាពហុជម្រើសសម្រាប់វិនិយោគិនអន្តរជាតិនូវយុទ្ធសាស្រ្តវិនិយោគផ្សេងៗ រាប់ចាប់តាំងពីទីផ្សារដែលមានកំណើនខ្ពស់តែប្រឈមហានិភ័យច្រើន រហូតដល់ទីផ្សារសេដ្ឋកិច្ចដែលមានហានិភ័យទាប តែមានស្ថិរភាពច្រើន និងមានភាពចាស់ទុំ។ វិស័យអចលនទ្រព្យក្នុងតំបន់នេះ នឹងរក្សាបានកំណើនប្រកបដោយចីរភាព ឡើងវិញ ដែលជំរុញដោយ នគរូបនីយកម្ម ការកើនឡើងនៃចំនួនប្រជាជនវណ្ណៈកណ្តាល និងកំណើននៃលំហូរចូល វិនិយោគបរទេស។ សម្រាប់វិនិយោគិនដែលមានឆន្ទៈក្នុងការរុករកទិដ្ឋភាពទីផ្សារអចលនទ្រព្យដែលមានក្របខណ្ឌបទប្បញ្ញត្តិ និងលក្ខខណ្ឌទីផ្សារចម្រុះ ទីផ្សារអចលនទ្រព្យនៅអាស៊ីអាគ្នេយ៍ ផ្តល់នូវឱកាសគួរឱ្យទាក់ទាញសម្រាប់ ទាំងតម្លៃដើមទុន និងទិន្នផលជួល ចាប់ពីឆ្នាំ ២០២៥នេះទៅ៕

The post ទីផ្សារអចលនទ្រព្យអាស៊ីអាគ្នេយ៍ ត្រៀមខ្លួនសម្រាប់កំណើន ដែលមិនធ្លាប់មានពីមុនមក appeared first on Construction & Property News.

ការចូលរួមផ្នែកហិរញ្ញវត្ថុរបស់ចិននៅក្នុងប្រទេសកម្ពុជា បានវិវឌ្ឍយ៉ាងសំខាន់ក្នុងរយៈពេល ប៉ុន្មានឆ្នាំចុង ក្រោយនេះ ដោយបង្ហាញពីទិដ្ឋភាពផ្សេងគ្នាលើគ្រប់វិស័យ។ តួលេខប្រាក់កម្ចីរបស់ រដ្ឋាភិបាលកម្ពុជាពី ប្រទេសចិន មានការប្រែប្រួលគួរឱ្យកត់សម្គាល់ ដោយបានឈានដល់កម្រិតខ្ពស់បំផុតរហូតចំនួន ៦៥០ លានដុល្លារអាមេរិកក្នុងឆ្នាំ ២០១៨ បន្ទាប់មកមានចំនួនតិចជាង ៥៨០លានដុល្លារអាមេរិក និង ៦០០ លានដុល្លារក្នុងឆ្នាំ២០២២ និង ២០២៣ រៀងគ្នា មុនពេលឈានដល់ការផ្អាកទាំងស្រុងនៅ ត្រឹមត្រីមាសទី៣ ឆ្នាំ ២០២៤។

ទន្ទឹមនឹងនេះ វិស័យទេសចរណ៍ចាប់ផ្តើមបង្ហាញនិន្នាការងើបឡើងវិញ គួរឱ្យកត់សម្គាល់ពីកម្រិតទាប ដែលបណ្តាលមកពីជំងឺរាតត្បាតសកល។ ការមកដល់របស់ភ្ញៀវទេសចរចិន បានបង្ហាញពីភាពធន់ដ៏គួរឱ្យចាប់អារម្មណ៍សម្រាប់វិស័យទេសចរណ៍ ដោយបានកើនឡើងដល់ ១,៧លាននាក់នៅខែវិច្ឆិកា ឆ្នាំ២០២៤ ដែលតួលេខនេះ បង្ហាញពីភាពល្អប្រសើរឡើងយ៉ាងខ្លាំង បើធៀបនឹងចំនួនអ្នកទស្សនាត្រឹមតែ ៥០.០០០នាក់ ក្នុងឆ្នាំ២០២១។ ទោះជាយ៉ាងណាក៏ដោយ តួលេខនេះ នៅតែទាបជាងឆ្ងាយ បើធៀបនឹងកំណើន ដល់កម្រិតកំពូលមុនជំងឺរាតត្បាតសកល ដែលកាលណោះ មានអ្នកទេសចរមកកម្ពុជារហូតដល់ ២,៣ លាននាក់ ។ នេះមានន័យថា នៅមានគម្លាតចំនួនភ្ញៀវទេសចរប្រមាណ ១,៦ លាននាក់ទៀត ទើបបានស្មើកាលពីកំឡុងឆ្នាំ២០១៩។

ងាកមកមើលពីការព្យាករពីនិន្នាកា វិនិយោគពីបរទេសវិញ ស្ថិតិចុងក្រោយបង្ហាញពីទំនុកចិត្តឥតងាករេ របស់ចិនចំពោះសក្តានុពលទីផ្សាររបស់កម្ពុជា ទោះបីជាយន្តការផ្តល់មូលនិធិដែលចិនធ្លាប់ផ្តល់ជូនកម្ពុជា ហាក់មានការវិវត្តប្លែកថ្មីក៏ដោយ។ ទោះយ៉ាងណាក្តី ខណៈពេលដែលប្រាក់កម្ចីក្នុងក្របខណ្ឌរដ្ឋ ពោលគឺ ពីរដ្ឋាភិបាលចិនទៅរដ្ឋាភិបាលកម្ពុជា បានបង្អង់ជាបណ្ដោះអាសន្នដ៏ដោយ តែគេសង្កេតឃើញថា ការវិនិយោគពីវិស័យឯកជននៅតែបន្តហូរចូល ដោយ FDI របស់ចិនរក្សាបាននូវទីតាំងលេចធ្លោ របស់ខ្លួននៅកម្រិតប្រមាណ ៤៧% នៃការវិនិយោគបរទេសសរុបនៅក្នុងត្រីមាសទី២នៃឆ្នាំ ២០២៤ បង្ហាញឲ្យឃើញពីការថយចុះបន្តិចបន្តួចពីកម្រិតកំពូលនៃ ៥៦% ក្នុងឆ្នាំ ២០២៣។ ទិន្នន័យនេះ ជាពស្តុតាងបញ្ជាក់ឱ្យឃើញច្បាស់ពីការចាប់អារម្មណ៍យូរអង្វែងពីអ្នកវិនិយោគចិន នៅក្នុងសក្តានុពលកំណើនសេដ្ឋកិច្ចរបស់កម្ពុជា៕

The post ត្រឹមត្រីមាសទី៣ ឆ្នាំ២០២៤ , លំហូរវិនិយោគពីចិននៅតែបន្តគ្របដណ្តប់លើទីផ្សារកម្ពុជា, បើទោះជារដ្ឋចិននៅមិនទាន់មានការអនុម័តកម្ចីថ្មីក៏ដោយ! appeared first on Construction & Property News.

គិតត្រឹមដើមឆ្នាំ២០២៥ ទីផ្សារអចលនទ្រព្យរបស់កម្ពុជា បង្ហាញពីបញ្ហាប្រឈមសំខាន់ៗជាមួយនឹង អត្រាកាន់កាប់អគារការិយាល័យនៅត្រឹមកម្រិត ៦៥,១% ទាបជាងស្តង់ដារអន្តរជាតិ ដែលជាទូទៅមាន ចន្លោះពី ៨៥-៩០% ដែលរក្សាបាននូវតម្លៃជួលបុព្វលាភនៅត្រឹមរង្វង់ ២៧ដុល្លារ ក្នុងមួយម៉ែត្រការ៉េ នេះបើយោងតាមរបាយការណ៍ “Fearless Forecast” ដែលបង្ហាញដោយប្រធាន CBRE Cambodia លោក Marc Townsend នៅ Novotel Phnom Penh BKK1 កាលពីថ្ងៃទី ១៤ ខែមករា ឆ្នាំ ២០២៥។

វិស័យហាងលក់រាយ ប្រឈមមុខនឹងបញ្ហាស្រដៀងគ្នានេះដែរ ដែលមានអត្រាកាន់កាប់ហាងលក់រាយមាន នៅត្រឹមរង្វង់ ៦១,៨% ទាបជាងស្តង់ដារពិភពលោក ដែលជាទូទៅយ៉ាងហោចត្រូវមានចាប់ពីចន្លោះ ៩០-៩៥% សម្រាប់ទីផ្សារលក់រាយដែលមានសុខភាពល្អ។ ទោះបីជាមានបញ្ហាប្រឈមនឹងការកាន់កាប់ ទាំងនេះក៏ដោយ គេសង្កេតឃើញថា កន្លែងលក់រាយសំខាន់ៗនៅតែបន្តរក្សាតម្លៃបានប្រហែល ២២,៦ ដុល្លារក្នុងមួយម៉ែត្រការ៉េ ដែលបង្ហាញពីភាពមិនស៊ីសង្វាក់គ្នាដែលអាចកើតមានរវាងស្ថានភាពតម្លៃពិត នៃទីផ្សារ និងយុទ្ធសាស្រ្តកំណត់តម្លៃនៅក្នុងទិដ្ឋភាពអចលនទ្រព្យដែលកំពុងវិវត្តរបស់កម្ពុជា។

ការផ្គត់ផ្គង់ខុនដូចូលបន្ថែមថ្មីមកក្នុងទីផ្សារមានចំនួនជាង ៣២០០យូនីត ដែលកំពុងតែ បង្ហាញពីសញ្ញាណឲ្យមានការត្រួតពិនិត្យដោយប្រុងប្រយ័ត្នឡើងវិញសម្រាប់អ្នកអភិវឌ្ឍក្នុងវិស័យនេះ ខណៈតម្លៃលក់សម្រាប់ខុនដូ កម្រិតខ្ពស់នាពេលបច្ចុប្បន្ន គឺ ២.៦៥០ ដុល្លារ ក្នុងមួយម៉ែត្រការ៉េ ដែលស្ថិតនៅខាងក្រោមកម្រិតស្តង់ដារ ក្នុងតំបន់បន្តិច។ បើប្រៀបធៀបទៅ យើងឃើញថា ខុនដូប្រណីតក្នុងទីក្រុងបាងកក ជាមធ្យមមានតម្លៃ ៦.៥០០ ដុល្លារក្នុងមួយម៉ែត្រការ៉េ ខណៈ យូនីតមធ្យមក្នុងទីក្រុងភ្នំពេញ ជាធម្មតាមានតម្លៃ ២.២០០ ដុល្លារក្នុងមួយម៉ែត្រការ៉េ ដែលបង្ហាញថាទីផ្សារកំពុងរក្សាតម្លៃប្រកួតប្រជែងក្នុងបរិបទតំបន់។

ដោយឡែក ការបន្ថែមនៃគម្រោងថ្មីផ្នែកអគារប្រភេទអាផាតមិន ចំនួនជាង ២៤០យូនីត កំពុងតែ បង្ហាញពីការពង្រីកថ្មីមានតិចតួចនៅក្នុងទីផ្សារ ដោយតម្លៃជួលអគារអាផាតមិនកម្រិត A មានតម្លៃ ១៩,៣ ដុល្លារក្នុងមួយម៉ែត្រការ៉េ។ វិស័យសេវាកម្មអាផាតមិន បង្ហាញចន្លោះប្រហោងសម្រាប់ការកែលម្អ ដោយសារអត្រាកាន់កាប់បច្ចុប្បន្ន មានត្រឹមតែ ៥៥% នៅក្រោមកម្រិតស្តង់ដារដែលជាទូទៅគឺចន្លោះពី ៨៨-៩២% និងជាធម្មតាកម្រិតនេះ អាចសម្រេចបានដោយអគារអាផាតមិនជោគជ័យនានា នៅក្នុងទីក្រុងនៃប្រទេស អាស៊ីផ្សេងទៀត។ តួលេខនេះ បង្ហាញពីសក្តានុពលដ៏សំខាន់សម្រាប់កំណើននៅពេលដែលទីផ្សារ មានភាពចាស់ទុំ។

សូចនាករទីផ្សារទាំងនេះ បង្ហាញថា វិស័យអចលនវត្ថុរបស់កម្ពុជា កំពុងវិវត្តក្នុងដំណាក់កាលសំខាន់ មួយ មុននឹងឈានទៅដល់ភាពចាស់ទុំទីផ្សារ។ ជាមួយនឹងអត្រាកាន់កាប់អគារការិយាល័យ និងហាងលក់រាយ ស្ថិតក្រោមកម្រិតស្តង់ដារអន្តរជាតិដែលកំណត់ថាទីផ្សារដែលមានសុខភាពល្អ ជាធម្មតា នឹងមានអត្រា ទំនេរត្រឹមតែ ១០-១៥% សម្រាប់អគារការិយាល័យ និង ៥-១០% សម្រាប់ហាងលក់រាយប៉ុណ្ណោះនោះ  អ្នកអភិវឌ្ឍគម្រោងនិងភាគីជាប់ផលប្រយោជន៍ ប្រហែលជាត្រូវអនុវត្តការកែតម្រូវជាយុទ្ធសាស្រ្ត ដើម្បី កែលម្អមូលដ្ឋានគ្រឹះទីផ្សារបន្ថែមទៀត។

លោក Marc Townsend បានធ្វើការកត់សម្គាល់ថា សក្ដានុពលទីផ្សារបច្ចុប្បន្ន បង្ហាញពីតម្រូវការ សម្រាប់ការកែតម្រូវជាយុទ្ធសាស្រ្ត ជាជាងការព្រួយបារម្ភបែបទាន់ហន់ ដោយសង្កត់ធ្ងន់លើសារៈសំខាន់ នៃ យន្តការកែតម្រូវទីផ្សារ។ សម្រាប់វិស័យខុនដូ ការរក្សាបាននូវការប្រកួតប្រជែងតម្លៃ ព្រមជាមួយនឹងការធានាគុណភាពឲ្យបាននៅក្នុងទីផ្សារ នៅតែជាកត្តាសំខាន់ ជាពិសេសនៅពេលដែល ទីផ្សារខុនដូបែបប្រណីតក្នុងបណ្តាប្រទេសជិតខាងក្នុងតំបន់ បន្តបង្ហាញពីដំណើរការល្អខ្លាំង ។

ម្ចាស់អចលនៈទ្រព្យនៅគ្រប់វិស័យទាំងអស់ ប្រហែលជាត្រូវគិតគូរពីយុទ្ធសាស្ត្រផ្សេងទៀត ដើម្បីកែលម្អអត្រាការជួល ក្នុងនោះរាប់ទាំងការគិតគូរពីការកែសម្រួលអត្រាជួលដែលមានសក្តានុពល កែលម្អគ្រឿងបរិក្ខារអចលនទ្រព្យឲ្យប្រសើរឡើង និងវិធីសាស្រ្តវាយលុកទីផ្សារដ៏ខ្លាំងក្លាបន្ថែមទៀត ដើម្បីឲ្យស្របតាមស្តង់ដារទីផ្សារអន្តរជាតិ និងទាក់ទាញអ្នកជួលប្រកបដោយគុណភាពនៅ ក្នុងទិដ្ឋភាពទីផ្សារដែលកាន់តែមានលក្ខណៈប្រកួតប្រជែងនេះ៕

The post អ្នកជំនាញ៖ ឆ្នាំ២០២៥ យុទ្ធសាស្រ្តទីផ្សារអចលនវត្ថុនៅកម្ពុជាគួរមានយន្តការកែលម្អ, ខណៈទីផ្សារក្នុងតំបន់មានលក្ខណៈប្រកួតប្រជែងខ្លាំង! appeared first on Construction & Property News.

ប្រទេសកម្ពុជា ត្រៀមខ្លួនក្លាយជាអ្នកទទួលផលដ៏សំខាន់នៃការផ្លាស់ប្តូរគោលនយោបាយពាណិជ្ជកម្ម របស់សហរដ្ឋអាមេរិក ដោយអ្នកជំនាញបានព្យាករពីឱកាសផលិតកម្មសំខាន់ៗបន្ទាប់ពីលោក ប្រធានាធិបតីដូណាល់ត្រាំ  Donald Trump ត្រឡប់ចូលកាន់តំណែងវិញ ជាពិសេសនៅពេលដែលប្រទេសវៀតណាមអាចនឹងប្រឈមនឹងការដាក់កំហឹតពន្ធគយដ៏តានតឹងឡើងវិញដោយរដ្ឋាភិបាលអាមេរិកថ្មី ស្រដៀងនឹងការកំណត់ពីមុនដែលធ្លាប់បានធ្វើចំពោះចិន នេះ​បើ​យោងតាមបទវិភាគស្តីពី 2025 Fearless Forecast  របស់លោក Marc TownSend ប្រធាន CBRE Cambodia ​នៅ​ក្នុង​វេទិកា​អចលន​ទ្រព្យ​អាស៊ី​អាគ្នេយ៍​ក្នុង​ទីក្រុង​ភ្នំពេញ​នៅ​ថ្ងៃ​ទី១៤ ខែ​មករា ឆ្នាំ ២០២៥។

ការផ្លាស់ប្តូរគោលនយោបាយថ្មីរបស់សហរដ្ឋអាមេរិក  ត្រូវបានលោករំពឹងទុកថា អាចនឹងផ្លាស់ប្តូរយ៉ាងខ្លាំងនូវសក្ដានុពលផលិតកម្មអាស៊ីអាគ្នេយ៍។ ចំពោះមុខរបត់នយោបាយពិភពលោកថ្មីបែបនេះ ប្រទេសវៀតណាម ដែលបច្ចុប្បន្នកំពុងប្រឈមមុខនឹងអតុល្យភាពពាណិជ្ជកម្មដ៏ច្រើន ជាមួយ សហរដ្ឋអាមេរិក អាចនឹងក្លាយទៅជាអ្នករងគ្រោះច្រើនជាងគេមួយទៀត ចំពោះមុខយុទ្ធសាស្ត្រពន្ធដ៏ តឹងតែង ដែលលោកធ្លាប់បានអនុវត្តដូចគ្នាកាលពីមុនមកចំពោះប្រទេសចិន។

អ្នកវិភាគសេដ្ឋកិច្ចជាន់ខ្ពស់ក្នុងវេទិកាអចលនទ្រព្យនេះ បានធ្វើការកត់សម្គាល់ថា “លោក Trump នឹងកាត់ផ្តាច់វិស័យផលិតកម្មរបស់វៀតណាមជាមួយនឹងការដាក់កំហឹតពន្ធគយថ្មី តាមរបៀបដែលគាត់ធ្វើដាក់ប្រទេសចិន” ដោយលោកបានបន្ថែមថា “ហើយបើពិតជាដូច្នោះមែននោះ កម្ពុជាអាចនឹងក្លាយជាអ្នកឈ្នះដ៏ធំ” ។

ឆ្លងកាត់ការផ្លាស់ប្តូរយ៉ាងសំខាន់ ដែលគេអាចសម្គាល់បានដោយការអភិវឌ្ឍអគារការិយាល័យប្រភេទ កម្ពស់ដល់ទៅ ៥០-៦០ជាន់ ដែលមិនធ្លាប់មានពីមុនមក នេះជាការលោតផ្លោះយ៉ាងច្រើនខុសពីមុន ដែលទីក្រុងកម្ពុជាធ្លាប់តែមានអគារកម្ពស់អស់ច្រើនណាស់ត្រឹមតែ ១៨-២០ជាន់តែប៉ុណ្ណោះ។

មួយវិញទៀត ខណៈដែលសូចនាករទីផ្សារបច្ចុប្បន្នបង្ហាញពីអត្រាកាន់កាប់ដល់ទៅ ៦០% និងការថយ ចុះនៃអត្រាជួល តថភាពនេះបង្ហាញពីក្តីសង្ឃឹមនៃកំណើននៃវិស័យផលិតកម្ម ដែលអាចធ្វើ អោយទិដ្ឋភាព អចលនទ្រព្យពាណិជ្ជកម្មមានភាពរស់រវើកឡើងវិញ។

ពេលវេលាដ៏អំណោយផលបែបនេះ ហាក់ដូចជាជួយជំរុញយុទ្ធសាស្ត្រសម្រាប់ការវិវត្តវិស័យឧស្សាហកម្ម របស់កម្ពុជាដែលកំពុងសំឡឹងរកឪកាសដ៏ល្អបែបនេះដូច្នោះដែរ។ ខណៈដែលប្រទេសនេះ កំពុងបន្ត អនុវត្តគោលនយោបាយយ៉ាងសកម្មដើម្បីធានាបាននូវការប្តេជ្ញាចិត្តរបស់ក្រុមហ៊ុនវិនិយោគទាំងឡាយ រយៈពេលវែង ដោយផ្តោតលើការបង្កើនការកែច្នៃដើម្បីនាំចេញ និងការបង្កើនបន្ថែមតម្លៃក្នុងខ្សែ ច្រវាក់ផ្គត់ផ្គង់។ តាមពិតទៅវិធីសាស្រ្តនេះ ឆ្លុះបញ្ជាំងពីការផ្លាស់ប្តូររបស់វៀតណាម ដែលធ្លាប់បានប្រើជោគជ័យរួចមកហើយ ជាពិសេសក្នុងវិស័យដូចជាផលិតកម្មកាហ្វេជាដើម តែទោះជាយ៉ាងណាក្តី ឥឡូវនេះ ដល់វេនកម្ពុជាវិញម្តង បើសិនប្រទេសនេះ ចេះរៀបចំខ្លួនឱ្យឈានមុខគេក្នុងពេលវេលាដែលកំពុងមានការផ្លាស់ប្តូរសក្តានុពលពាណិជ្ជកម្មពិភពលោកដ៏មានអំណោយផលបែបនេះ។

ថែមពីលើនេះ បញ្ហាប្រឈមនាពេលបច្ចុប្បន្នរបស់វៀតណាម មានលើសពីត្រឹមតែសក្តានុពល ដែលអាចនឹងមានរឿងជម្លោះពាណិជ្ជកម្មជាមួយអាមេរិកវិញនេះទៅទៀត។ នៅក្នុងវេទិកាដដែល លោកវាគ្មិនក៏បានលើកឡើងអំពីការពន្យាពេលជើងហោះហើរដល់ទៅ ២ទៅ៣ ម៉ោងនៅអាកាសយដ្ឋានរបស់វៀតណាម និងការបង្ហាញពីភាពមិនរលូនផ្នែកហេដ្ឋារចនាសម្ព័ន្ធ។ ចំពោះមុខបញ្ហានេះ កម្ពុជាមើលឃើញឱកាសមួយដើម្បីក្លាយជាជម្រើសដ៏មានប្រសិទ្ធភាពជាងនេះ។

លោក Marc ក៏បានឆ្លៀតលើកឡើងផងដែរអំពីការប្រៀបធៀបសក្តានុពលតាមសមុទ្រ ដោយបានរំលេចថា បើទោះបីជាឆ្នេរសមុទ្រកម្ពុជាខ្លីជាងដល់ទៅប្រមាណ ៤២២ គីឡូម៉ែត្រធៀបនឹង ៣៥០០ គីឡូម៉ែត្ររបស់វៀតណាមក៏ដោយ ប៉ុន្តែតំបន់ឆ្នេររបស់កម្ពុជាមានលក្ខណៈប្រមូលផ្តុំ ដោយសកម្មភាពសេដ្ឋកិច្ចជាង ហើយអ្នកជំនាញណែនាំថា តំបន់អភិវឌ្ឍន៍ដែលប្រមូលផ្តុំនេះ អាចក្លាយជាអត្ថប្រយោជន៍មួយក្នុងកំណើនឧស្សាហកម្មដែលមានលក្ខណៈសមាហរណកម្ម ។

ចំណែកឯវិស័យធនាគាររបស់កម្ពុជា ក៏កំពុងសម្របខ្លួនទៅនឹងការផ្លាស់ប្តូរសក្តានុពលទាំងនេះ ដោយមានការណែនាំដើម្បីប្តូរទិសដៅនៃការប្រើប្រាស់មូលនិធិ ពីការអភិវឌ្ឍការិយាល័យឆ្ពោះទៅរក ការអភិវឌ្ឍគម្រោងបែបលំនៅដ្ឋានដែលមានតម្លៃសមរម្យ និងហេដ្ឋារចនាសម្ព័ន្ធឧស្សាហកម្មវិញ។ អ្នក ជំនាញផ្នែកអចលនទ្រព្យ បានស្នើមតិជាអនុសាសន៍ ឲ្យអ្នកអភិវឌ្ឍគម្រោងប្រើយុទ្ធសាស្ត្រ  “កសាងតិច តែមានអ្នកទិញច្រើន” ជាពិសេសនៅពេលដែលទ្រព្យសកម្មដែលមានស្រាប់ មាននៅក្នុងការបញ្ចុះតម្លៃ យ៉ាងសំខាន់ ដែលមានគម្រោងខ្លះឈានដល់ ៥០% នៃតម្លៃដើមរបស់ពួកគេ។

ជាមួយនឹងការផ្លាស់ប្តូរគោលនយោបាយការបរទេសអាមេរិកថ្មីនេះ គំរូប្រតិបត្តិការក្នុងតំបន់ត្រូវបាន គេរំពឹងថានឹងវិវឌ្ឍឡើងវិញ ហើយនៅពេលនោះ កិច្ចព្រមព្រៀងថ្មីៗ នឹងកើតឡើងជាចម្បងនៅក្នុងប្រទេសកម្ពុជា និងអាស៊ីអាគ្នេយ៍។ ខណៈពេលដែល ស្ថាប័នវិនិយោគអន្តរជាតិ កំពុងរក្សាជំហរប្រុងប្រយ័ត្ន វិនិយោគិនចិនក៏នឹងអាចវិលត្រឡប់មកកាន់ទីផ្សារ កម្ពុជាវិញ ដែលត្រូវបានជំរុញដោយបញ្ហាប្រឈមនៅក្នុងតំបន់ផ្សេងទៀត និងទីតាំងយុទ្ធសាស្ត្រដែលមាន ភាពទាក់ទាញ កាន់តែខ្លាំងឡើងរបស់កម្ពុជាក្នុងវិស័យផលិតកម្មក្នុងតំបន់។

ជាមួយគ្នានោះ វិស័យលក់រាយនៅកម្ពុជា ក៏បង្ហាញពីកំណើនដ៏ជោគជ័យ ដោយមានអ្នកចូលថ្មីជាពិសេសពីទីផ្សារអាស៊ី ចាប់ផ្តើមមានវត្តមាននៅក្នុងទីផ្សារក្នុងស្រុករបស់កម្ពុជា។ ផ្សាររាត្រីដែលគ្រប់គ្រងបានល្អ និងគម្រោងកែលំអទីក្រុង ដោយអនុគ្រោះដល់ការជួសជុលលើ ការអភិវឌ្ឍឡើងវិញនៅតាមទីក្រុង បង្ហាញពីហេដ្ឋារចនាសម្ព័ន្ធទីផ្សារដែលមានភាពចាស់ទុំ។ លើសពីនេះ នៅពេលដែលប្រទេសកម្ពុជាបញ្ចូលបច្ចេកវិទ្យា AI ទៅក្នុងប្រតិបត្តិការអាជីវកម្ម និងពង្រឹងបទប្បញ្ញត្តិនៃភ្នាក់ងារអចលនទ្រព្យ និងអ្នកអភិវឌ្ឍន៍ នៅពេលនោះ កម្ពុជានឹងហាក់ដូចជាត្រៀមខ្លួនកាន់តែខ្លាំងឡើងដើម្បីទាញយកប្រយោជន៍ពីការផ្លាស់ប្តូរសក្តានុពលនៅក្នុងគំរូពាណិជ្ជកម្មពិភពលោកថ្មី។

អ្នកជំនាញទីផ្សារអចលនទ្រព្យសង្កត់ធ្ងន់ថា ខណៈដែលការត្រឡប់មកវិញដ៏មានសក្តានុពលរបស់ លោក Trump អាចជំរុញឱកាសសំខាន់ៗសម្រាប់ប្រទេសកម្ពុជាក៏ពិតមែន ប៉ុន្តែភាពជោគជ័យរបស់ប្រទេសនេះ នឹងពឹងផ្អែកលើសមត្ថភាពរបស់ខ្លួនក្នុងការអភិវឌ្ឍហេដ្ឋារចនាសម្ព័ន្ធយ៉ាងឆាប់រហ័ស និងការរក្សាបាននូវគុណសម្បត្តិប្រកួតប្រជែងក្នុងការផលិត និងវិស័យភស្តុភារ៕

The post អ្នកជំនាញ៖ ដូណាល់ត្រាំអាចនឹងផ្តាច់ខ្សែច្រវាក់ផលិតកម្មវៀតណាមដូចធ្វើដាក់ចិន ហើយកម្ពុជានឹងមានផលចំណេញច្រើន appeared first on Construction & Property News.

ទីផ្សារអចលនទ្រព្យក្នុងតំបន់អាស៊ីប៉ាស៊ីហ្វិក ហាក់បង្ហាញភាពស្វាហាប់ឡើងវិញសម្រាប់ឆ្នាំ២០២៥ ដែលត្រូវបានជំរុញដោយការធ្លាក់ចុះអត្រាការប្រាក់សកល និងការព្យាករកំណើន GDP ក្នុងតំបន់ ចំនួន ៤,៤% បើទោះបីជាបញ្ហាប្រឈមដែលបណ្តាលមកពីការតស៊ូទីផ្សារអចលនទ្រព្យរបស់ប្រទេសចិន និងភាពតានតឹងភូមិសាស្ត្រនយោបាយក៏ដោយ នេះបើយោងតាមការវិភាគ អ្នកជំនាញអចលនទ្រព្យប្រចាំតំបន់អាស៊ី Benjamin Cole របស់ស្ថាប័នស្រាវជ្រាវអចលនទ្រព្យ irei.com ចេញផ្សាយនៅថ្ងៃទី ២១ ខែធ្នូ ឆ្នាំ២០២៤។

ប្រភពដដែលបានឱ្យដឹងថា កំណើន GDP ក្នុងតំបន់ កើនឡើងដល់ ៤,៦% នៅឆ្នាំ ២០២៤ មុនពេលថយចុះមកត្រឹម ៤,៤% នៅឆ្នាំ ២០២៥ យោងតាមទស្សនវិស័យប្រចាំឆមាសប្រចាំឆ្នាំរបស់មូលនិធិរូបិយវត្ថុអន្តរជាតិ (IMF) ដែលបានចេញផ្សាយក្នុងខែវិច្ឆិកា ឆ្នាំ ២០២៤ ។ តួលេខដដែលនេះ ត្រូវបានបញ្ជាក់ដោយធនាគារពិភពលោកប្រចាំតំបន់អាស៊ីបូព៌ា និងប៉ាស៊ីហ្វិក។

និន្នាការអត្រាការប្រាក់ និងផលប៉ះពាល់អចលនទ្រព្យ

កត្តាសំខាន់ដែលជំរុញអចលនទ្រព្យអាស៊ីប៉ាស៊ីហ្វិកនៅឆ្នាំ២០២៥  គឺការបន្ធូរបន្ថយអត្រាការប្រាក់រយៈពេលវែងនៅទូទាំងប្រទេសសេដ្ឋកិច្ចធំៗ។ ជាក់ស្តែង ធនាគារប្រជាជនចិន (PBOC) ទើបតែបានចាប់ផ្តើមកាត់បន្ថយអត្រាការប្រាក់យ៉ាងសម្បើមនៅចុងឆ្នាំ ២០២៤ ដែលគាំទ្រដោយអត្រាអតិផរណាត្រឹមតែ ០,៣%នៃអត្រាប្រចាំឆ្នាំ ក្នុងខែតុលា ឆ្នាំ ២០២៤។ ដូចគ្នានេះដែរ ធនាគារកណ្តាលពិភពលោកដូចជាធនាគារកណ្តាលអាមេរិក ធនាគារអង់គ្លេស និងធនាគារកណ្តាលអ៊ឺរ៉ុប ក៏បានបង្ហាញពីការបន្ធូរបន្ថយគោលនយោបាយរូបិយវត្ថុ បង្កើតបរិយាកាសអំណោយផលសម្រាប់ការវិនិយោគអចលនទ្រព្យផងដែរ។ ផ្ទុយទៅវិញ ធនាគារកណ្តាលជប៉ុន (BOJ) របស់ប្រទេសជប៉ុន ថ្វីត្បិតតែបានដំឡើងអត្រាការប្រាក់តិចតួចក្នុងឆ្នាំ ២០២៤ ប៉ុន្តែនៅតែបន្តរក្សាជំហរជាមួយនឹងអត្រាការប្រាក់សម្រាប់រយៈពេលខ្លី នៅត្រឹម ០,២៥% និងអត្រារយៈពេលវែងប្រហែល ១% ។

ប្រទេសជប៉ុន៖ កន្លែងសុវត្ថិភាពសម្រាប់អចលនទ្រព្យ

ប្រទេសជប៉ុននៅតែបន្តទាក់ទាញទំនុកចិត្តរបស់អ្នកវិនិយោគជាមួយនឹងទីផ្សារអចលនទ្រព្យដ៏រឹងមាំរបស់ខ្លួន។ អត្រាជួលក្នុងទីផ្សារការិយាល័យរបស់តូក្យូ បានឃើញការកើនឡើង ៤,៤% នៃអត្រាប្រចាំឆ្នាំ គិតត្រឹមត្រីមាសទី ៣ ឆ្នាំ ២០២៤ ជាមួយនឹងអត្រាទំនេរ ៤,៧%។ ការងើបឡើងវិញនៃវិស័យសណ្ឋាគារ និងលក់រាយរបស់ប្រទេសជប៉ុន ដែលជំរុញដោយការកើនឡើងនៃវិស័យទេសចរណ៍ ធ្វើឱ្យមានភាពរឹងមាំបន្ថែមទៀត។ សណ្ឋាគារប្រណីត កំពុងកត់ត្រាប្រាក់ចំណូលខ្ពស់ ខណៈដែលភ្ញៀវទេសចរភាគច្រើន ចូលពីកូរ៉េខាងត្បូង ចិន និងសហរដ្ឋអាមេរិក កំពុងស្តារសកម្មភាពពាណិជ្ជកម្មការធ្វើដំណើរឡើងវិញ។

អាស៊ីអាគ្នេយ៍ និងឥណ្ឌា៖ តារាសេដ្ឋកិច្ចកំពុងរះថ្មី

មួយវិញទៀត ភាពធន់នឹងសេដ្ឋកិច្ចនៃតំបន់អាស៊ីប៉ាស៊ីហ្វិក មួយភាគធំ ត្រូវបានគាំទ្រដោយដំណើរការដ៏រឹងមាំនៅក្នុងប្រទេសដែលមានសេដ្ឋកិច្ចកំពុងរីកចម្រើនដូចជាប្រទេសឥណ្ឌា ដែលត្រូវបានព្យាករថា នឹងសម្រេចបាននូវកំណើន GDP ៦,៥% នៅឆ្នាំ ២០២៥ ដោយសារភាពអំណោយផលពីកត្តាប្រជាសាស្រ្តរបស់ប្រទេស ហើយ កំពុងវិវត្តខ្លួនក្លាយជាមជ្ឈមណ្ឌលផលិតកម្ម និងសេវាកម្មបច្ចេកទេសសកល។ ទន្ទឹមនឹងនេះ បណ្តាប្រទេសក្នុងតំបន់អាស៊ីអាគ្នេយ៍ កំពុងទទួលបានអត្ថប្រយោជន៍ពីកំណើនចំនួនប្រជាជន និងប្រាក់ចំណូលក្នុងតំបន់ដែលកំពុងកើនឡើង ក្នុងនោះឥណ្ឌូនេស៊ី ហ្វីលីពីន និងវៀតណាម នឹងសម្រេចបាននូវអត្រាកំណើន GDP ៥,១%, ៦,១% និង៦,១% រៀងគ្នានៅឆ្នាំ ២០២៥ នេះបើយោងតាម IMF ។

អាស៊ីអាគ្នេយ៍ ផ្តល់ឱកាសគួរឱ្យទាក់ទាញសម្រាប់វិនិយោគិនពីប្រទេសសេដ្ឋកិច្ចរីកចម្រើន ដោយមានឥណ្ឌូនេស៊ី វៀតណាម និងហ្វីលីពីននាំមុខគេក្នុងកំណើនក្នុងតំបន់។ ចំនួនប្រជាជនដែលកំពុងពង្រីកក្នុងតំបន់នេះ ដែលត្រូវបានព្យាករថានឹងកើនឡើងបន្ថែមចំនួន ៧៤១ លាននាក់ក្នុងទសវត្សរ៍ក្រោយ រួមផ្សំជាមួយនឹងការកើនឡើងនៃប្រាក់ចំណូល បង្កើតជាទីតាំងភូមិសាស្ត្រអំណោយផលខ្លាំងសម្រាប់ការវិនិយោគអចលនទ្រព្យ។ ទន្ទឹមនឹងនេះ ទីផ្សារអចលនទ្រព្យរបស់ប្រទេសឥណ្ឌានៅតែបន្តរីកចម្រើន ដោយមានឧស្សាហកម្ម ឃ្លាំង និងការិយាល័យមានតម្រូវការដែលមិនធ្លាប់មានពីមុនមក។ អ្នកវិភាគ ចង្អុលបង្ហាញឱ្យឃើញពីការលេចចេញរបស់ឥណ្ឌាជាមជ្ឈមណ្ឌលទេសចរណ៍ខាងវិស័យអភិវឌ្ឍន៍អចលនទ្រព្យដែលបម្រើឱ្យសេវាអភិវឌ្ឍចិត្តវិញ្ញាណ និងជារោងចក្រថាមពលដែលជាកត្តាជំរុញកំណើនដ៏សំខាន់។

បញ្ហាប្រឈមមួយចំនួន និងច្រកចេញសម្រាប់អនាគតនៃអចលនទ្រព្យក្នុងតំបន់

ក្នុងទិដ្ឋភាពប្រវត្តិសេដ្ឋកិច្ច ទីផ្សារអចលនទ្រព្យរបស់ប្រទេសចិន នៅតែជាបញ្ហាប្រឈមដ៏សំខាន់បំផុតរបស់តំបន់ ដោយប្រឈមនឹងការធ្លាក់ចុះគួរឱ្យកត់សម្គាល់ នៅក្នុងសន្ទស្សន៍អចលនទ្រព្យរបស់ Hang Seng ចាប់តាំងពីខែមករាឆ្នាំ ២០២០។ វិស័យសំខាន់ៗ រួមមានលំនៅដ្ឋាន និងការិយាល័យ ប្រឈមនឹងការផ្គត់ផ្គង់លើស ការថយចុះតម្លៃជួល និងអត្រាទំនេរខ្ពស់។ គួរកត់សម្គាល់ថា China Evergrande Group ដែលធ្លាប់ជាក្រុមហ៊ុនអភិវឌ្ឍន៍អចលនទ្រព្យដ៏មានតម្លៃបំផុតរបស់ពិភពលោកបានប្រឈមនឹងការក្ស័យធននៅឆ្នាំ ២០២៣ និងការរំលាយនៅឆ្នាំ ២០២៤ ដែលហេតុការណ៍នេះ នៅតែបង្ហាញពីភាពងាយរងគ្រោះរបស់វិស័យនេះនៅឡើយ។ ទោះបីជាមានឧបសគ្គទាំងនេះ ក៏ដោយ IMF បានព្យាករថា GDP របស់ប្រទេសចិន នឹងកើនឡើង ៤,៥% នៅឆ្នាំ ២០២៥ ដែលត្រូវបានជំរុញដោយការជំរុញការអនុវត្តគោលនយោបាយសារពើពន្ធរបស់រដ្ឋ និងអន្តរាគមន៍របស់ធនាគារកណ្តាល។

សម្រាប់ឆ្នាំ ២០២៥ ខណៈពេលដែលទីផ្សារអចលនទ្រព្យអាស៊ីប៉ាស៊ីហ្វិក នៅបន្តប្រឈមមុខនឹងវិបត្តិអចលនទ្រព្យរបស់ប្រទេសចិន និងភាពមិនប្រាកដប្រជានៃសេដ្ឋកិច្ចសកល ភាពរឹងមាំជាមូលដ្ឋានរបស់តំបន់ ដែលនៅតែបន្តទ្រទ្រង់សេដ្ឋកិច្ចរួមមាន – ការកើនឡើងប្រាក់ចំណូល កំណើនប្រជាសាស្រ្ត និងការអភិវឌ្ឍន៍ហេដ្ឋារចនាសម្ព័ន្ធដ៏រឹងមាំ – បានបង្កើតភាពធន់ និងផ្តល់ជាមូលដ្ឋានគ្រឹះសម្រាប់ការងើបឡើងវិញដ៏ជោគជ័យមួយសម្រាប់អ្នកវិនិយោគរយៈពេលវែង។ នៅពេលដែលសេដ្ឋកិច្ចពិភពលោកងើបឡើងវិញ ព្រមជាមួយនឹងអត្រាការប្រាក់មានភាពងាយស្រួលជាងមុននោះ  ប្រទេសក្នុងតំបន់អាស៊ីប៉ាស៊ីហ្វិក នឹងក្លាយជាគោលដៅមានសក្តានុពលច្រើន ក្នុងទិដ្ឋភាពអចលនទ្រព្យសកល៕

The post ការព្យាករណ៍អចលនទ្រព្យអាស៊ីប៉ាស៊ីហ្វិកឆ្នាំ ២០២៥៖ ការប្រឈម ភាពធន់ និងឱកាស appeared first on Construction & Property News.

ក្នុងកិច្ចពិភាក្សាតុមូលមួយ ក្រោមចំណងជើងថា “ស្ថានភាពបំណុលនៅកម្ពុជា” លោក ជូ វណ្ណៈ អគ្គនាយកនិយ័តករអាជីវកម្មអចលនវត្ថុ និងបញ្ចាំ បានលើកឡើងថា បច្ចុប្បន្នអ្នកទិញផ្ទះបង់រំលស់ជាមួយបុរីដែលមានអាជ្ញាបណ្ណពីនិយ័តករ និងអាជីវកម្មអចលនវត្ថុ មានប្រមាណ ៨០០ ទៅ ៩០០លានដុល្លារ ឬប្រហែល ១ពាន់លានដុល្លារ។ តួលេខដ៏ធំសម្បើមនេះ បានបង្ហាញពីបន្ទុកហិរញ្ញវត្ថុដ៏ធ្ងន់របស់អ្នកទិញផ្ទះនៅក្នុងទិដ្ឋភាពសេដ្ឋកិច្ចបច្ចុប្បន្ន។

នាឱកាសនោះដែរ លោកអគ្គនាយកបានលើកឡើងថា បច្ចុប្បន្នក្រុមហ៊ុនអភិវឌ្ឍបុរីចំនួន ៨៣ មានបំណុលជាមួយធនាគារក្នុងនាមជានីតិបុគ្គលមានប្រមាណ ១៥០០លានដុល្លារ, និងអ្នកដែលបានខ្ចីធនាគារស្ថិតក្នុងកម្រិតរូបវ័ន្តបុគ្គល មានប្រមាណ ៥០០លានដុល្លារ សរុបទៅមានប្រមាណ ២ពាន់លានដុល្លារ សម្រាប់គម្រោងអភិវឌ្ឍលំនៅដ្ឋាន ហើយម្ខាងទៀត​ជាកម្ចី​សម្រាប់អ្នកបង់រំលោះជាមួយអ្នកអភិវឌ្ឍន៍មានខ្ទង់ ១ពាន់លានដុល្លារ។ ស្ថានភាពនេះបានបញ្ជាក់ពីភាពតានតឹងផ្នែកហិរញ្ញវត្ថុទាំងម្ចាស់ផ្ទះ និងអ្នកអភិវឌ្ឍន៍។

ជាមួយគ្នានេះដែរលោក វណ្ណៈ ក៏បានលើកឡើងពីទិន្នន័យរបស់ធនាគារជាតិនៃកម្ពុជាថា បំណុលសរុបក្នុងវិស័យសំណង់ និងអចលនទ្រព្យបានកើនលើសពី ១៨ពាន់លានដុល្លារ បើគិតត្រឹមខែកញ្ញា ឆ្នាំ២០២៤។

ទាក់ទិននឹងបញ្ហាបំណុលនេះដែរ លោក គង់ ឆៃឡេង ជាស្ថាបនិក និងជានាយកក្រុមហ៊ុន HRTS CONSULTING ក៏បានបង្ហាញនូវតួលេខបំណុលដ៏គួរឱ្យភ្ញាក់ផ្អើលថា បច្ចុប្បន្នប្រជាជនកម្ពុជាមានប្រាក់កម្ចីផ្ទាល់ខ្លួនប្រមាណ ៥០ពាន់លានដុល្លារ រួមជាមួយកម្ចីអាជីវកម្មចំនួន ៧ពាន់លានដុល្លារ សរុបទៅមានប្រមាណជា ៥៧ពាន់លានដុល្លារ ដែលកំពុងជំពាក់ធនាគារ និងគ្រឹះស្ថានមីក្រូហិរញ្ញវត្ថុ។

ទោះជាយ៉ាងណាក៏ដោយ បំណុលសរុបទាំង ៥៧លានដុល្លារនេះ នៅមិនទាន់រាប់បញ្ចូលអ្នកដែលជំពាក់បំណុលក្រៅផ្លូវការ ដែលមិនមានកត់ត្រានៅក្នុងប្រព័ន្ធ CBC នោះទេ។

គួរបញ្ជាក់ទៀតថា ចំពោះបំណុលដែលសងយឺតលើសពី ៣០ថ្ងៃ នៅក្នុងវិស័យធនាគារ និងហិរញ្ញវត្ថុកម្ពុជា គឺមានចំនួន ៧,៥% និងសងយឺតលើសពី ៩០ថ្ងៃ មានជិត ៦%។ ស្ថិតិទាំងនេះកំពុងបង្ហាញពីការលំបាកផ្នែកហិរញ្ញវត្ថុដែលកំពុងកើនឡើងនៅកម្ពុជា។

នៅពេលដែលប្រទេសកម្ពុជាកំពុងស្វែងយល់ពីទិដ្ឋភាពបំណុលដែលកំពុងកើនឡើងនេះ អ្នកជំនាញបានអំពាវនាវឱ្យមានការខិតខំប្រឹងប្រែងរួមគ្នាដើម្បីបង្កើតដំណោះស្រាយដែលអាចជួយសម្រាលបន្ទុកបុគ្គល និងលើកកម្ពស់បរិយាកាសសេដ្ឋកិច្ចឱ្យមានសុខភាពល្អប្រសើរឡើងវិញ។

The post អ្នកជំនាញបង្ហាញការព្រួយបារម្ភ ខណៈបំណុលទិញផ្ទះក្នុងបុរីនៅកម្ពុជាកើនដល់ប្រមាណ $១ពាន់លាន appeared first on Construction & Property News.

ទីផ្សារអចលនទ្រព្យអាស៊ានបូក៣ ដែលគ្របដណ្តប់ប្រទេសអាស៊ានរួមជាមួយនឹងប្រទេសចិន ហុងកុង ជប៉ុន និងកូរ៉េ កំពុងប្រឈមនឹងការធ្លាក់ចុះនៃតម្លៃ និងបរិមាណទំនិញប្រតិបត្តិការ ដែលរួមផ្សំដោយឧបសគ្គផ្នែកហិរញ្ញវត្ថុ ស្តុកអតិរេក និងអ្នកអភិវឌ្ឍន៍ដែលមានហានិភ័យ។ បញ្ហាប្រឈមទាំងនេះ បូកបន្ថែមលក្ខខណ្ឌហិរញ្ញវត្ថុកាន់តែតឹងរ៉ឹង និងការថយចុះទំនុកចិត្តរបស់អ្នកទិញ បញ្ជាក់ពីតម្រូវការបន្ទាន់សម្រាប់វិធានការស្តារស្ថេរភាពទាំងក្នុងវិស័យអចលនទ្រព្យ និងហិរញ្ញវត្ថុ នៅក្នុងតំបន់អាស៊ានបូក៣។ ស្ថានភាពនេះត្រូវបានគូសបញ្ជាក់នៅក្នុងការវិភាគថ្នាក់តំបន់ នាពេលថ្មីៗនេះ ដែលចុះផ្សាយដោយ Thailand-business-news នៅថ្ងៃទី១៤ ខែវិច្ឆិកា ឆ្នាំ ២០២៤។

ការតស៊ូនៃការស្តារឡើងវិញក្រោយជំងឺរាតត្បាត

គេនៅចាំបានថា បន្ទាប់ពីវិបត្តិជំងឺរាតត្បាតសាកល ទីផ្សារអចលនទ្រព្យនៅក្នុងប្រទេសសេដ្ឋកិច្ចអាស៊ានបូក៣ បានប្រឈមមុខនឹងឧបសគ្គធ្ងន់ធ្ងរ។ កំណើនសេដ្ឋកិច្ចយឺតរបស់ប្រទេសចិន រួមជាមួយនឹងបញ្ហាហិរញ្ញវត្ថុរបស់អ្នកអភិវឌ្ឍន៍ធំៗដូចជា Evergrande និង Country Garden បានរីកដុះដាលពាសពេញតំបន់ ដែលគំរាមកំហែងដល់ស្ថាប័នហិរញ្ញវត្ថុថា្នក់តំបន់ទាំងមូល។ បរិមាណប្រតិបត្តិការចរាចរទំនិញក្នុងតំបន់ បានធ្លាក់ចុះ ហើយជាង ២០% នៃមូលបត្របំណុលដែលបោះលក់ដោយអ្នកអភិវឌ្ឍន៍អចលនទ្រព្យអាស៊ាន+៣ ដែលភាគច្រើនត្រូវបានគេវាយតម្លៃថាជា “ប័ណ្ណបំណុល” ដែលមានហានិភ័យខ្ពស់នោះ  ត្រូវបានគេរំពឹងថា នឹងដល់ពេលអស់សុពលភាពនៅត្រឹមឆ្នាំ ២០២៥ ដែលកត្តានេះ នឹងបង្កើនហានិភ័យខ្លាំងជាងពេលមុន។ ថ្វីបើមានការលំបាកទាំងនេះក៏ដោយ ក៏សេដ្ឋកិច្ចសម្រាប់តែប្រទេសក្នុងតំបន់អាស៊ាននៅតែស្ថិតក្នុងភាពស្រពិចស្រពិលនៅឡើយ ថ្វីត្បិតតែបានចៀសផុតពីផលប៉ះពាល់ធ្ងន់ធ្ងរជាពិសេសគឺផុតពីវិបត្តិប្រព័ន្ធហិរញ្ញវត្ថុ ដែលឃើញមាននៅក្នុងប្រទេសសមភាគីបូក៣ របស់ខ្លួនក៏ពិតមែន។

ដោយឡែកនៅទូទាំងពិភពលោក វិស័យអចលនទ្រព្យពាណិជ្ជកម្មក្នុងប្រទេសដែលមានសេដ្ឋកិច្ចជឿនលឿន រួមទាំងសហរដ្ឋអាមេរិក និងផ្នែកខ្លះនៃទ្វីបអឺរ៉ុប បានបង្ហាញពីភាពធន់ បើទោះបីជាភាពងាយរងគ្រោះមួយចំនួននៅតែបន្តកើតមានក៏ដោយ។ ទោះយ៉ាងណាក្តី ទំហំនៃបញ្ហាប្រឈមនៅក្នុងតំបន់អាស៊ាន+៣ ជាពិសេសផ្នែកហិរញ្ញប្បទានអចលនទ្រព្យ នៅតែស្ថិតក្នុងស្ថានភាពយ៉ាប់យឺនខ្លាំងនៅឡើយ។

ហានិភ័យ​ហិរញ្ញវត្ថុ និង​ការ​ធ្លាក់​ចុះនៃកម្ចីវិនិយោគ​ក្នុងទីផ្សារខ្ពស់

លទ្ធភាពទទួលបានប្រាក់ចំណេញ និងសេវាបំណុលរបស់អ្នកអភិវឌ្ឍន៍អចលនទ្រព្យបានធ្លាក់ចុះយ៉ាងខ្លាំងចាប់តាំងពីឆ្នាំ ២០២១ ជាមួយនឹងកម្ចីវិនិយោគក្នុងទីផ្សារខ្ពស់ កាលពីក្នុងអំឡុងពេលនៃសេដ្ឋកិច្ចរីកចំរើនមុនមានវិបត្តិ ឥឡូវនេះបានក្លាយមកជាការបង្កហានិភ័យយ៉ាងខ្លាំងទៅវិញ ចំពេលមានការកើនឡើងអត្រាការប្រាក់ និងស្ថានភាពទីផ្សារកាន់តែអាក្រក់។ អ្វីដែលរឹតតែគួរឱ្យព្រួយបារម្ភទៅទៀតនោះ គឺសម្ពាធលើការផ្តល់ហិរញ្ញប្បទានឡើងវិញ បានបន្ថែមទម្ងន់លើបញ្ហានេះ នៅពេលដែលអ្នកអភិវឌ្ឍន៍គម្រោងអចលនទ្រព្យនានា កំពុងតែប្រឹងទ្រទ្រង់ប្រតិបត្តិការក្រោមការត្រួតពិនិត្យផ្នែកហិរញ្ញវត្ថុដែលកំពុងមានការរឹតបន្តឹងស្រាប់ទៅហើយ។

យុទ្ធសាស្ត្រធ្វើឱ្យមានស្ថិរភាពផ្នែកអចលនទ្រព្យ និងហិរញ្ញវត្ថុ

ដើម្បីដោះស្រាយបញ្ហាប្រឈមដែលកំពុងកើនឡើងទាំងនេះ អ្នកជំនាញបានស្នើយុទ្ធសាស្រ្តមួយដែលគេហៅថា យុទ្ធសាស្ត្រ​ទ្វេកោណ “dual-pronged strategy”។ ទី១ ពាក់ព័ន្ធនឹងការអនុវត្តវិធានការកំណត់គោលដៅដើម្បីប្រឆាំងនឹងអារម្មណ៍ទីផ្សារអវិជ្ជមាន និងការពារការបរាជ័យរបស់ក្រុមហ៊ុនទាំងឡាយណាដែលមានបញ្ហាជាប់គាំងលំហូរសាច់ប្រាក់បន្ទាន់មិនអាចដោះបំណុលបាន។ តាមយុទ្ធសាស្ត្រនេះ រដ្ឋាភិបាល ត្រូវជ្រើសរើសគាំទ្រគម្រោងណា ដែលមើលទៅមានលទ្ធភាពអាចសម្រេចជោគជ័យបានតែកំពុងប្រឈមមុខនឹងភាពតានតឹងផ្នែកសាច់ប្រាក់បណ្តោះអាសន្ន ទន្ទឹមនឹងនោះត្រូវអនុវត្តដោយប្រុងប្រយ័ត្ននូវគោលនយោបាយ «ជំរុញតម្រូវការទីផ្សារ» ដែលស្របតាមតម្រូវការជាតិ។

យុទ្ធសាស្ត្រទី២ ក្នុងពេលជាមួយគ្នានេះ ការពង្រឹងវិស័យហិរញ្ញវត្ថុតម្រូវឱ្យមានការធ្វើពិពិធកម្មគំរូអាជីវកម្មរបស់ធនាគារតូចៗ ពង្រឹងភាពធន់របស់ស្ថាប័នមិនមែនធនាគារ និងការរឹតបន្តឹងក្របខ័ណ្ឌច្បាប់ដើម្បីលើកកម្ពស់ការផ្តល់ប្រាក់កម្ចីប្រកបដោយការទទួលខុសត្រូវ។ វិធានការទាំងនេះ មានគោលបំណងធ្វើឱ្យទីផ្សារអចលនទ្រព្យមានស្ថិរភាព ខណៈពេលដែលធានាឱ្យប្រព័ន្ធហិរញ្ញវត្ថុនៅតែរឹងមាំ និងអាចសម្របខ្លួនបាន។

ផ្លូវឆ្ពោះទៅមុខដើម្បីភាពធន់

ខណៈពេលដែលសេដ្ឋកិច្ចអាស៊ាន+៣ កំពុងរកផ្លូវចេញពីបញ្ហាប្រឈមទាំងនេះ កិច្ចខិតខំប្រឹងប្រែងនិងយុទ្ធសាស្ត្របន្សាំរួមគ្នារបស់ប្រទេសក្នុងតំបន់ នឹងដើរតួយ៉ាងសំខាន់ក្នុងការកាត់បន្ថយហានិភ័យ និងពង្រឹងទីផ្សារប្រឆាំងនឹងភាពមិនច្បាស់លាស់នាពេលអនាគត។ ការផ្តោតការយកចិត្តទុកដាក់រួមគ្នាលើស្ថិរភាពទាំងវិស័យអចលនទ្រព្យ និងហិរញ្ញវត្ថុបែបនេះ បញ្ជាក់ពីការប្តេជ្ញាចិត្តរបស់បណ្តាប្រទេសក្នុងតំបន់ក្នុងការសម្រេចបាននូវភាពធន់ និងកំណើនសេដ្ឋកិច្ចរយៈពេលវែង៕

The post អ្នកជំនាញអចលនទ្រព្យផ្តល់យុទ្ធសាស្ត្រថ្មីដើម្បីរកច្រកចេញ ខណៈទីផ្សារអចលនទ្រព្យអាស៊ាន+៣ នៅបន្តជាប់គាំង ហាក់គ្មានពន្លឺ appeared first on Construction & Property News.