បន្ទាប់ពីអគ្គនាយកដ្ឋានពន្ធដារ បានប្រកាសកាលពីខែសីហាកន្លងមកនេះថា រាល់ចំណេញមូលធន ដែលរួមទាំងចំណេញពីការលក់អចលនទ្រព្យ គឺត្រូវជាប់ពន្ធ ២០% ដោយគិតចាប់ពី ខែ មករា ឆ្នាំ ២០២២ នេះ មានការមន្ទិលសង្ស័យជាច្រើនពីសាធារណជនថាតើពន្ធថ្មីនេះនឹងត្រូវអនុវត្តយ៉ាងដូចម្តេច?

ក្រុមហ៊ុនច្បាប់ឈានមុខគេ DFDL និងភ្នាក់ងារអចលនទ្រព្យ CBRE Cambodia កាលពីថ្ងៃទី ៣០ ខែកញ្ញា នេះ បានរៀបចំសិក្ខាសាលាមួយដើម្បីបំភ្លឺរាល់ចម្ងល់ជាច្រើនជាពិសេសផលប៉ះពាល់នៃពន្ធថ្មីនេះលើវិស័យអចលនទ្រព្យនៅកម្ពុជា។

ក្រុមវាគ្មិនដែលចូលរួមឆ្លើយសំណួររួមមាន លោក Clint O’Connell អគ្គនាយករង និងប្រធានផ្នែកពន្ធប្រចាំក្រុមហ៊ុន DFDL Mekong (Cambodia) លោក Charles Amar ប្រធានផ្នែកអចនទ្រព្យប្រចាំក្រុមហ៊ុន DFDL Mekong (Cambodia) អ្នកនាង អាន សុធីតា នាយិកាក្រុមហ៊ុន CBRE Cambodia និង លោក James Hodge នាយកជាន់ខ្ពស់ប្រចាំក្រុមហ៊ុន CBRE Cambodia។ នៅក្នុងវេទិកាសំណួរ-ចម្លើយ ពាក់ព័ន្ធនឹងចម្ងល់ពន្ធចំណេញមូលធន និងផលប៉ះពាល់លើវិស័យអចលនទ្រព្យនៅកម្ពុជារវាងវាគ្មិន និងអ្នកចូលរួមដូចតទៅ៖

១. តើពន្ធចំណេញមូលធននឹងប៉ះពាល់ដល់វិស័យអចលនទ្រព្យយ៉ាងដូចម្តេច?

ផលប៉ះពាល់គឺខុសគ្នាអាស្រ័យលើប្រភេទអាជីវកម្ម។ ប្រសិនបើអ្នកជាក្រុមហ៊ុនអភិវឌ្ឍអចលនទ្រព្យ អ្នកនឹងមិនរងផលប៉ះពាល់ទេ ព្រោះពន្ធនេះមិនបានអនុវត្តលើក្រុមហ៊ុនដែលបានចុះបញ្ជីនៅប្រទេសកម្ពុជានោះទេ។ ប៉ុន្តែបើអ្នកជាវិនិយោគិនជាបុគ្គល អ្នកនឹងប៉ះពាល់ ដោយចំណាយនៃការលក់អចលនទ្រព្យនឹងកើនឡើង ព្រោះត្រូវបង់ពន្ធ។

លើសពីនេះ ពន្ធនេះនឹងដាក់សម្ពាធ លើចំនួននៃការទិញ-លក់អចលនទ្រព្យ ដោយសារប្រជាជនមិនចង់ទិញ ឬលក់ក្នុងរយៈពេលខ្លីនោះទេ។ ពួកគេអាចនឹងរង់ចាំរយៈពេល ៥ ឆ្នាំ សិនមុននឹងលក់ ដើម្បីជៀសវាងការបង់ពន្ធ ដែលនេះអាចធ្វើឱ្យទីផ្សារមិនសូវមានចរន្ត។ ផ្ទុយទៅវិញ ពន្ធនេះក៏នឹងជួយគ្រប់គ្រងតម្លៃអចលនទ្រព្យកុំឱ្យឡើងថ្លៃហួស ព្រោះពន្ធនេះនឹងជួយកាត់បន្ថយពួកអ្នកបំប៉ោងតម្លៃហើយលក់យកតែចំណេញក្នុងរយៈពេលខ្លី។

ទោះជាយ៉ាងណា ផលប៉ះពាល់គឺមានចំពោះតែដី ឬអចលទ្រព្យជាប់ដីប៉ុណ្ណោះ ចំណែកឯអចលនទ្រព្យប្រភេទផ្សេងៗទៀតដូចជាខុនដូ អាចជាមិនសូវប៉ះពាល់ធ្ងន់ធ្ងរទេ ព្រោះការលក់ខុនដូគឺមិនសូវជាចំណេញច្រើនប៉ុន្មានទេសម្រាប់ការលក់ជាបុគ្គល។

២. តើយើងគួរលក់អចលនទ្រព្យចេញមុនពេលដែលពន្ធនេះអនុវត្តនៅឆ្នាំក្រោយ ឬយ៉ាងណា?

ចម្លើយគឺអាស្រ័យលើស្ថានភាពហិរញ្ញវត្ថុរបស់បុគ្គលម្នាក់ៗ។ ក្នុងអំឡុងវិបត្តិកូវីដបែបនេះ តម្លៃអចលនទ្រព្យដូចជាមិនសូវល្អទេ។ ប្រសិនបើអ្នកលក់ពេលនេះ គឺមិនចាំបាច់បង់ពន្ធក៏ពិតមែន តែក៏មិនសូវចំណេញច្រើនដែរ។ ប៉ុន្តែបើអ្នកលក់នៅពេលសេដ្ឋកិច្ចបានស្ទុះងើបឡើងវិញ អ្នកនឹងត្រូវបង់ពន្ធ តែក៏ចំណេញច្រើនជាងមុនដែរ។ ដូច្នេះវាពិតជាអាស្រ័យលើការគណនានិងស្ថានភាពហិរញ្ញវត្ថុបច្ចុប្បន្ន របស់បុគ្គលម្នាក់ៗ។

៣. តើយើងត្រូវបង់ទាំងពន្ធអចលនទ្រព្យ (ពន្ធប្រថាប់ត្រា) ៤% និងពន្ធចំណេញមូលធន ២០% ឬយ៉ាងណា?

ជាទូទៅ ពន្ធអចលនទ្រព្យ ឬពន្ធប្រថាប់ត្រា៤% ត្រូវបង់ដោយអ្នកទិញ។ ផ្ទុយទៅវិញ ពន្ធចំណេញមូលធន ២០% ជាកាតព្វកិច្ចរបស់អ្នកលក់។ ទោះយ៉ាងណាក្ដី កាតព្វកិច្ចអាចប្រែប្រួលអាស្រ័យលើលក្ខខណ្ឌនៃកិច្ចសន្យារវាងអ្នកទិញនិងអ្នកលក់ តើនរណាជាអ្នកបង់ពន្ធប្រថាប់ត្រា។

៤. តើយើងអាចបូកពន្ធប្រថាប់ត្រាដែលបង់ពេលទិញជាការកាត់ចំណាយនៅពេលយើងលក់បានដែរទេ?
បើអ្នកបានបង់ពន្ធប្រថាប់ត្រាពេលទិញ អ្នកអាចរាប់បញ្ចូលថាជាចំណាយបាន ក្នុងការគណនាប្រាក់ចំណេញដែលជាប់ពន្ធទៅអោយអ្នកលក់អចលនទ្រព្យនោះ ។

៥. មានវិធី ២យ៉ាងក្នុងការគណនាចំណាយ ទី១ ចំណាយជាក់ស្តែង និងទី២ ការអនុលោមឱ្យកាត់ចំណាយ ៨០%។ តើយើងអាចអាចជ្រើសរើសវិធីសាស្រ្តដោយខ្លួនឯងបានឬទេ?

អ្នកបង់ពន្ធមានសិទ្ធិជ្រើសរើសវិធីណាមួយក៏បាន។ ប៉ុន្តែនាយកដ្ឋានពន្ធដា មានសិទ្ធិតវ៉ា ឬសើរើតម្លៃទិញលក់ដី និង/ឬការចំណាយផ្សេងៗ ប្រសិនបើមន្ត្រីមានការសង្ស័យ។ ប៉ុន្តែមានចំណុចគួរឱ្យសង្កេតមួយគឺ បើអ្នកជ្រើសរើសវិធីកាត់កងចំណាយ ៨០% ក្រោយគណនារួច គឺដូចជាបង់ពន្ធ ៤% នៃតម្លៃដី ពោលគឺស្មើនឹងពន្ធប្រថាប់ត្រាដែរ។
គណនា៖ តម្លៃដី ១០០ដុល្លារ កាត់ចំណាយ៨០% ចំណេញ ២០ដុល្លារ ហើយបង់ពន្ធ ២០% គឺស្មើនឹង ៤ដុល្លារ ឬ ៤%។

៦. តើការអនុលោមឱ្យកាត់ចំណាយ ៨០% អនុវត្តលើចំណេញមូលធនផ្សេងៗដូចជាចំណេញមូលបត្រឬភាគហ៊ុនបានដែរឬទេ?

មិនបានទេ។ ច្បាប់ចែងយ៉ាងច្បាស់ថា វិធីសាស្រ្តកាត់ចំណាយ ៨០% ចំពោះការលក់អចលនវត្ថុប៉ុណ្ណោះ។ ដូច្នេះអ្នកត្រូវប្រើវិធីសាស្ត្រចំណាយជាក់ស្តែង សម្រាប់ការចំណេញផ្សេងៗទៀត។

៧. តើក្រុមហ៊ុនដែលបានចុះបញ្ជីត្រូវបង់ពន្ធចំណេញមូលធននៅពេលលក់អចលនទ្រព្យឬទេ?

ពន្ធលើការចំណេញមូលធនមិនអនុវត្តចំពោះក្រុមហ៊ុនចុះបញ្ជីទេ។ ក្រុមហ៊ុនគឺនឹងស្ថិតនៅក្រោមការបង់ពន្ធលើប្រាក់ចំណូលទូទៅ។

៨. ខ្ញុំជួសជុលប្តូរអចលពទ្រព្យផ្ទាល់ខ្លួនទៅជាប្រភេទអចលនទ្រព្យម្ចាស់ផ្សេងៗគ្នា ឬ Strata Title។ នៅពេលលក់ តើជាប់ពន្ធចំណេញមូលធនដែរឬទេ?

ការផ្លាស់ប្ដូរទម្រង់ ឬប្រភេទនៃអចលនទ្រព្យ គឺមិនជាប់ពន្ធទេ។ តែបើមានការលក់គឺត្រូវជាប់ពន្ធ។ និយាយឱ្យខ្លី បើមានការផ្ទេរកម្មសិទ្ធិ អ្នកលក់ទទួលបានប្រាក់ចំណេញ គឺត្រូវតែជាប់ពន្ធ។

៩. តើត្រូវបង់ពន្ធនៅពេលណា នៅពេលការចុះហត្ថលេខាលើកិច្ចសន្យាទិញលក់ ឬពេលផ្ទេរកម្មសិទ្ធិ?

គួរបញ្ជាក់ថាអ្នកនឹងត្រូវជាប់ពន្ធក្នុងករណីណាមួយខាងក្រោម៖
១) មានការលក់ ការផ្ទេរ ឬការបង្កើតសិទ្ធិកាន់កាប់
២) នៅពេលផ្ទេរកម្មសិទ្ធិ ឬមានការចុះបញ្ជីជាមួយអាជ្ញាធរ
៣) ការផ្ទេរកម្មសិទ្ធិកាន់កាប់តាមរយៈការកាត់ក្តីរបស់តុលាការ
អ្នកលក់ ឬ ម្ចាស់ដើម ត្រូវបង់ពន្ធក្នុងកំឡុងពេល ៣ ខែបន្ទាប់ពីបានអនុវត្ដករណីណាមួយខាងលើ។

១០. តើការផ្ទេរអចលនទ្រព្យផ្ទាល់ខ្លូនទៅជារបស់ក្រុមហ៊ុនដែលខ្ញុំជាម្ចាស់ តើជាប់ពន្ធឬទេ?

បុគ្គល និងក្រុមហ៊ុន ជាមនុស្ស ២នាក់ផ្សេងគ្នា។ ដូច្នេះដរាបណា មានការផ្ទេរ ហើយមានចំណេញ គឺត្រូវជាប់ពន្ធ។ តែបើគ្មានចំណេញគឺមិនជាប់ពន្ធទេ។

The post វេទិកាសំណួរ-ចម្លើយ៖ ពន្ធចំណេញមូលធននិងផលប៉ះពាល់លើវិស័យអចលនទ្រព្យកម្ពុជា appeared first on Construction & Property News.

The post នាទីស្វែងយល់ ភាគទី ៤១៖ ប្រភេទអាជ្ញាបណ្ណ ឬលិខិតអនុញ្ញាតអាជីវកម្មអភិវឌ្ឍន៍អចលនវត្ថុនៅកម្ពុជា appeared first on Construction & Property News.

The post បទសម្ភាសន៍៖ស្វែងយល់ពីបំណុលបរទេសរបស់កម្ពុជានិងការចូលរួមចំណែកក្នុងការអភិវឌ្ឍសេដ្ឋកិច្ច appeared first on Construction & Property News.

បើយោងតាមធនាគារអភិវឌ្ឍន៍អាស៊ី (ADB) ទីក្រុងធំ ៗនៅតំបន់អាស៊ីនាពេលបច្ចុប្បន្ន កំពុងជួបប្រទះបញ្ហាប្រឈមដូចជា ចរាចរណ៍កកស្ទះ ការបំពុលបរិយាកាស និងជាពិសេសកង្វះសួនច្បារនិងទីធ្លាបៃតង។

ទីក្រុងភ្នំពេញត្រូវបានគេវាយតម្លៃថាជាទីក្រុងមួយក្នុងចំណោមទីក្រុងដែលមានតំបន់បៃតងទាបជាងគេបំផុតសម្រាប់មនុស្សម្នាក់ៗក្នុងតំបន់អាស៊ាន ពោលគឺមានត្រឹមតែ ១,១ ម៉ែត្រការ៉េប៉ុណ្ណោះសម្រាប់មនុស្សម្នាក់តែប៉ុណ្ណោះ។

ទាក់ទងនឹងបញ្ហានេះ អ្នកយកព័ត៌មានទស្សនាវដ្ដីសំណង់និងអចលនទ្រព្យ បានជួបសម្ភាសន៍ជាមួយនឹង លោកស៊ឹន សុជាតិ ប្រធានសមាគមស្ថាបត្យករកម្ពុជា និងជាប្រធានក្រុមហ៊ុនគ្រុបហ្វរ ស្ថាបត្យករ និង វិស្វករ ដើម្បីពិភាក្សាពីតុល្យភាពរវាងកំណើននៃអគារខ្ពស់និងផ្ទៃបៃតងនៅទីក្រុងភ្នំពេញ។

តើអគារបៃតងគឺជាអ្វី?

និយមន័យនៃពាក្យ ‘Green ‘ គឺធំទូលាយណាស់ ។ ការដាំដើមឈើឬមានសួនច្បារតូចមួយនៅក្នុងផ្ទះ គឺជាការចាប់ផ្តើមមួយដ៏ល្អ ប៉ុន្តែនេះគ្រាន់តែជាផ្នែកតូចមួយប៉ុណ្ណោះនៃពាក្យថា Green។ ក្នុងនាមជាស្ថាបត្យករ “អគារបៃតង” មានន័យថាជាអគារទាំងឡាយណាដែល ទាំងការរចនា ការសាងសង់ និងការប្រតិបត្តិការរបស់អគារនោះ អាចជួយកាត់បន្ថយផលប៉ះពាល់អវិជ្ជមាន ឬបង្កើតផលវិជ្ជមានទៅលើអាកាសធាតុនិងបរិស្ថានរបស់យើង។ និយាយម៉្យាងទៀត គឺអគារដែលមានផលល្អដល់ធនធានធម្មជាតិក៏ដូចជាធ្វើឲ្យគុណភាពជីវិតប្រសើរឡើង។ អគារបៃតងត្រូវតែគោរពតាមលក្ខខណ្ឌដូចជា ការប្រើប្រាស់ថាមពលប្រកបដោយប្រសិទ្ធភាព ការពិចារណាលើបរិស្ថាន ការប្រើប្រាស់ខ្សែសង្វាក់ផ្គត់ផ្គង់សម្ភារៈសំណង់ដែលមិនប៉ះពាល់ដល់បរិស្ថាន ការរចនាប្លង់ដែលអាចសម្របខ្លួនបានទៅនឹងការផ្លាស់ប្តូរនៃអាកាសធាតុ ។ ល។

តើស្ថាបត្យករគួរមានតួនាទីអ្វីខ្លះក្នុងការរួមចំណែកបង្កើតតុល្យភាពនៃអគារបៃតង?

ក្នុងនាមជាស្ថាបត្យករឬវិស្វករ ពួកយើងដើរតួយ៉ាងសំខាន់ណាស់។ ប្រសិនបើផ្ទះរចនាឡើងមិនត្រឹមត្រូវ ផ្ទះនោះនឹងប្រើប្រាស់ថាមពលច្រើនលើសពីចាំបាច់។ ផ្ទះគឺក្ដៅគ្រប់ពេលវេលា ហើយយើងត្រូវតែបើកម៉ាស៉ីនត្រជាក់គ្រប់ពេលវេលាដែរ ដែលនេះជាការបង្កើនចំណាយ ហើយថែមទាំងបំពុលបរិស្ថានផងដែរ។ ដោយឡែក ប្រសិនបើផ្ទះនេះត្រូវបានរចនាត្រឹមត្រូវដោយមានចរន្តខ្យល់ និងពន្លឺចេញចូលគ្រប់គ្រាន់ សម្របទៅតាមទិសនៃកំដៅថ្ងៃ ផ្ទះនោះនឹងត្រជាក់ អ្នកនៅក្នុងផ្ទះក៏នឹងមិនសូវបើកម៉ាស៉ីនត្រជាក់ដែរ ហើយវានឹងប៉ះពាល់តិចជាងមុន។ នេះគឺជាឧទាហរណ៍មួយនៃអគារបៃតង។ លើសពីនេះ ខ្សែសង្វាក់សម្ភារសំណង់ដែលមិនប៉ះពាល់ដល់បរិស្ថាន ក៏គឺជាផ្នែកសំខាន់មួយទៀត។ ប្រសិនបើយើងត្រូវកាត់ដើមឈើរាប់ពាន់ដើម ឬយកថ្មចេញពីលើភ្នំទាំងមូលដើម្បីសង់ផ្ទះឬអគារមួយ អគារនោះគឺមិនមែនជាអគារបៃតងនោះទេ។ នៅក្នុងបណ្តាប្រទេសអភិវឌ្ឍន៍មួយចំនួនដូចជាសហរដ្ឋអាមេរិក គឺគេមានភ្នាក់ងារមើលការខុសត្រូវនឹងវាយតម្លៃលើបញ្ហានេះតែម្ដង ។

តើប្រទេសកម្ពុជាកំពុងប្រឈមនឹងបញ្ហាអ្វីខ្លះទាក់ទងនឹងបរិបទអគារបៃតងនេះ?

បញ្ហាប្រឈមធំបំផុតដែលមិនអាចប្រកែកបានសម្រាប់ប្រទេសកម្ពុជាគឺ កង្វះថវិកា កង្វះអ្នកជំនាញ និងកង្វះស្ថាប័នទទួលខុសត្រូវ។ កង្វះថវិការបស់រដ្ឋាភិបាលក្នុងការដោះស្រាយបញ្ហានេះគឺជាបញ្ហាមួយចំបង។ ប៉ុន្តែកន្លងមករដ្ឋាភិបាលក៏មិនបាននៅស្ងៀមដែរ ឧទាហរណ៍ដូចជាក្រសួងបរិស្ថានបាននិងកំពុងធ្វើការស្អិតរមួតលើបញ្ហានេះក្រោមជំនួយរបស់រដ្ឋាភិបាលកូរ៉េខាងត្បូង។ ប៉ុន្តែបញ្ហានេះគឺយឺតយ៉ាវ ដោយសារតែបញ្ហាថវិកាគឺជាបញ្ហាធំ ដូចដែលយើងទាំងអស់គ្នាបានដឹងស្រាប់។

ក្នុងនាមជាស្ថាបត្យករ តើលោកគិតថាគួរតែមានដំណោះស្រាយយ៉ាងដួចម្ដេច?

ឧបសគ្គធំបំផុតដែលមនុស្សភាគច្រើនបានលើកឡើងទាក់ទងនឹងអគារបៃតង គឺរឿងការចំណាយខ្ពស់ជាងអគារធម្មតា។ នេះគឺជាការពិតមួយដែលមិនអាចប្រកែកបាន ព្រោះថាកម្ពុជាត្រូវនាំចូលផលិតផលសម្ភារសំណង់ជាច្រើនពីបរទេស ដែលមានតម្លៃខ្ពស់។ ទោះយ៉ាងណាក្ដី ខ្ញុំគិតថាអគារបៃតងគឺមិនចាំបាច់ត្រូវតែថ្លៃគ្រប់អគារនោះទេ។ សម្រាប់ប្រទេសកម្ពុជា យើងអាចចាប់ផ្តើមពីតូចៗសិន យើងមិនចាំបាច់ធ្វើតាមលក្ខខណ្ឌដូចដែលបានរៀបរាប់ខាងលើទាំងអស់នោះទេ។ យើងអាចចាប់ផ្តើមពីការរចនាល្អ ឧទាហរណ៍ដូចជាការមានចរន្តខ្យល់ និងពន្លឺចេញចូលគ្រប់គ្រាន់ និងសម្របទៅតាមទិសនៃកំដៅថ្ងៃជាដើម ការធ្វើបែបនេះ គឺមិនចំណាយច្រើននោះទេ។ ដំណោះស្រាយមួយទៀតគឺ សួនច្បារលើដំបូល ដូចនៅប្រទេសសិង្ហបុរី ដែលនេះគឺជាគំរូល្អដែរយើងគួរតែយកតម្រាប់តាម។ ម្យ៉ាងវិញទៀត ទោះបីជាអគារបៃតងអាចមានតម្លៃថ្លៃជាងអគារធម្មតាបន្ដិចក៏ពិតមែន ប៉ុន្តែខ្ញុំចង់ឲ្យទាំងអ្នកអភិវឌ្ឍន៍និងអ្នករស់នៅក្នុងលំនៅដ្ឋានផ្ទាល់យល់ដឹងសារជាថ្មីថា ចំណាយច្រើនបន្ដិចពេលសង់ផ្ទះ ប៉ុន្ដែគឺចំណាយតិចនៅពេលរស់នៅ។ ខ្ញុំគិតថានេះគឺជាចំណុចទាក់ទាញនិងលើកទឹកចិត្តដ៏ធំមួយ សម្រាប់ទាំងអ្នកអភិវឌ្ឍន៍និងអ្នករស់នៅក្នុងលំនៅដ្ឋាន ឲ្យងាកមកចូលរួមនិងយកចិត្តទុកដាក់បន្ថែមលើការបង្កើតអគារបៃតងឲ្យបានកាន់តែច្រើន ។

ទោះបីមានបញ្ហាប្រឈមយ៉ាងណាក្ដី លោកសុជាតិ នូវតែមានសុទិដ្ឋិនិយមយ៉ាងមុតមាំថាប្រទេសកម្ពុជានឹងផ្លាស់ប្តូរជាទីក្រុងបៃតងជាមិនខាន ប៉ុន្តែអាចត្រូវការពេលវេលាយូរបន្កិច ព្រោះនាពេលបច្ចុប្បន្ន ទាំងរដ្ឋាភិបាលនិងវិស័យឯកជន កំពុងមានទិសដៅតែមួយ ក្នុងគោលបំណងសម្រេចឲ្យបាននូវតុល្យភាពនិងចេរភាពការរីកចម្រើននៃសំណង់និងភាពបៃតងទៅព្រមៗគ្នា។

The post អគារបៃតង៖ ដំណោះស្រាយចំពោះវិស័យសំណង់ប្រកបដោយចីរភាព appeared first on Construction & Property News.

បច្ចុប្បន្នអ្នកទិញលក់ដីក្នុងស្រុកមួយចំនួនធំ កំពុងប្រឈមនឹងនិន្នាការនិងទំនោទិញដីតាមការបំប៉ោងរបស់ទីផ្សារ ឧទាហរណ៍ដូចជាករណីដែលតម្លៃដីនៅស្រុកកណ្តាលស្ទឹងបានកើនឡើងយ៉ាងឆាប់រហ័សកាលពីប៉ុន្មានខែកន្លងមកនេះ គឺដោយសារមានអ្នកទិញលក់ដីក្នុងស្រុកជាច្រើនបានផ្អើលទិញដីនៅទីនោះក្រោយពីបានលឺព័ត៌មានអំពីគម្រោងព្រលានយន្តហោះថ្មី។

ដោយសារតែបញ្ហានេះ បានធ្វើឲ្យសង្គមចោទជាសំណួរថា តើការផ្អើលទិញដីតាមគ្នាបែបនេះមានហានិភ័យដែរឬទេ?

អ្នកយកព័ត៌មានទស្សនាវដ្ដីសំណង់និងអចលនទ្រព្យ បានជួបសម្ភាសន៍ជាមួយលោក សន សៀប ដែលជាស្ថាបនិក និងនាយកនៃក្រុមហ៊ុន Key Real Estate Co., Ltd. និងជាអ្នកឯកទេសផ្នែកអចលនទ្រព្យដ៏ល្បីល្បាញមួយរូបនៅក្នុងប្រទេសកម្ពុជា ដើម្បីឲ្យលោកជួយបំភ្លឺពីបញ្ហាទាំងអស់នេះ។

តើយើងគួរតែទៅទិញដីតាមតែគេផ្អើល ឬយ៉ាងណា?

ជាទូទៅបើគេមិនចំណេញពួកគេប្រហែលជាមិនផ្អើលទិញទេ។ ដូច្នេះចម្លើយខ្ញុំគឺទាំង គួរ និង មិនគួរ។

យើងគួរទិញប្រសិនបើយើងមានលុយផ្ទាល់ខ្លួនសល់សំរាប់វិនិយោគហើយមិនរំពឹងថានឹងទទួលបានប្រាក់ចំណេញក្នុងរយៈពេលខ្លី។ យើងក៏ត្រូវតែមានជំនាញនិងចេះវិភាគស្ថានភាពដីនៅតាមតំបន់ដែលគេផ្អើលនោះផងដែរ។ ប៉ុន្តែបើយើងខ្ចីលុយគេទៅទិញដីតាមគេផ្អើល ហើយរំពឹងថានឹងទទួលបានប្រាក់ចំណេញក្នុងរយៈពេលខ្លី ខ្ញុំណែនាំថាយើងមិនគួរទិញទេ ព្រោះយើងអាចនឹងកប់លុយលើដី ហើយថែមទាំងត្រូវបង់ការប្រាក់ទៅលើប្រាក់កម្ចីរនោះថែមទៀត។

ឧទាហរណ៍ករណីការផ្អើលទិញដីនៅស្រុកកណ្តាលស្ទឹង សួរថាតើគម្រោងនេះនឹងចាប់ផ្តើមនៅពេលណា? បើវានឹងចាប់ផ្តើមក្នុងពេលឆាប់ៗ តើវានឹងបញ្ចប់នៅពេលណា? ប្រាក់វិនិយោគរបស់យើងនឹងកប់នៅទីនោះយ៉ាងហោចណាស់ ១០ ឆ្នាំ។ តើអ្នកណានឹងមកទិញដីរបស់យើង? ដូច្នេះ យើងត្រូវគិតឲ្យបានច្បាស់លាស់មុននឹងសំរេចចិត្តទិញ ។

តើលោកមានគន្លឹះអ្វីណែនាំអ្នកទិញលក់ដីក្នុងការជ្រើសរើសទិញដីឲ្យបានត្រឹមត្រូវ?

យើងគួរតែទិញដីដូចជាយើងទិញត្រីនៅផ្សារអញ្ចឹង គឺយើងត្រូវតែចេះរើសនិងពូកែស្វែងរករបស់ល្អតែតម្លៃថោកបំផុត។ មុននឹងទិញ យើងត្រូវសួរខ្លួនឯងថា ហេតុអ្វីបានជាយើងទិញដីនៅទីនោះ? ដោយសារតែវាមានតំលៃថោកឬទិញតាមគេ? តើពេលណាដែលយើងគ្រោងនឹងលក់? ដើមទុនគឺជាប្រាក់សន្សំ ឬប្រាក់កម្ចី? លើសពីនេះទៀតក៏នៅមានកត្តាជាច្រើន ដែលយើងត្រូវពិចារណាបន្ថែមទៀតផងដែរ។

នៅក្នុងរាជធានីភ្នំពេញ លោកគិតថាតំបន់ណាដែលល្អបំផុតសម្រាប់ការវិនិយោគលើដីនាពេលបច្ចុប្បន្ន?

ប្រសិនបើនិយាយអំពីតម្លៃដីធ្លីខ្ពស់បំផុតនៅពេលនេះគឺខណ្ឌដូនពេញខណ្ឌ ខណ្ឌ៧មករា និង ខណ្ឌចំការមន។ ខណ្ឌសែនសុខក៏ជាទីតាំងល្អមួយផងដែរព្រោះគម្រោងជាច្រើននឹងកើនឡើងនៅទីនោះ។ ប៉ុន្តែប្រសិនបើយើងកំពុងស្វែងរកការវិនិយោគនាពេលអនាគត ខ្ញុំគិតភាគខាងកើតនៃរាជធានីភ្នំពេញជាតំបន់ដែលនឹងមានសក្តានុពលការរីកចម្រើនផ្នែកអចលនទ្រព្យនាពេលអនាគត។ ខ្ញុំគិតថា ៥ ទៅ ១០ ឆ្នាំខាងមុខនេះ ជាពិសេសនៅពេលមានស្ពាន តម្លៃដីនៅទីនោះនឹងឡើងខ្ពស់។ ភាគខាងកើតនៃរាជធានីភ្នំពេញគឺជាទីតាំងដ៏ល្អ ដែលយើងអាចមើលឃើញទេសភាពទាំងមូលនៃរាជធានីភ្នំពេញ។ វាជាទីតាំងល្អសម្រាប់ការសាងសង់ខុនដូនិងសណ្ឋាគារនាពេលអនាគត។

ក្រៅពីរាជធានីភ្នំពេញ ក្រុងព្រះស៊ីហនុ និងសៀមរាប តើលោកគិតថាតំបន់ណានឹងមានសក្តានុពលអចលនទ្រព្យនាពេលអនាគត?

ខ្ញុំគិតថាសក្តានុពលអចលនទ្រព្យបន្ទាប់ពីទីក្រុងសំខាន់ទាំង៣ គឺកំពតនិងកែប។ ខេត្តទាំងពីរនេះអាចនឹងទាក់ទាញអ្នកអភិវឌ្ឍន៍ និងអ្នកបណ្ដាក់ទុនបានច្រើន ដោយសារតែដីនៅទីនោះនៅមានតម្លៃសមរម្យ រួមផ្សំជាមួយនឹងទីតាំងល្អក្បែរឆ្នេរសមុទ្រ មានព័ទ្ធដោយភ្នំ និងកន្លែងកំសាន្តផ្សេងៗទៀត។ ខេត្តទាំងពីរនេះក៏កំពុងតែមានប្រជាប្រិយភាពទាក់ទាញភ្ញៀវទេសចរណ៍ក្នុងស្រុក ជាពិសេសពីក្រុងភ្នំពេញ ដែលជាកត្តាធ្វើឲ្យកើនឡើងនូវតម្រូវការផ្នែកទីកន្លែងស្នាក់នៅ។ ការស្ដារឡើងវិញនិងពង្រីកផ្លូវជាតិលេខ៣ ដែលតភ្ជាប់ពីភ្នំពេញទៅកំពតរបស់រដ្ឋាភិបាលក៏ជាកត្តាជំរុញមួយផងដែរ។

The post គន្លឹះសំខាន់ៗក្នុងការជ្រើសរើសទិញលក់ដី appeared first on Construction & Property News.

សំណួរ៖ តើអ្វីទៅជាគុណសម្បត្តិ និងគុណវិបត្តិនៃការទិញផ្ទះស្រាប់ នឹងផ្ទះក្នុងគម្រោង?

ចម្លើយ៖ ទោះបីជាមានចំណុចល្អៗជាច្រើនលើកឡើងអំពីការទិញផ្ទះដែលស្ថិតនៅក្នុងគម្រោង ឧទាហរណ៍ ការទិញផ្ទះក្នុងបុរីថ្មីមួយដែលស្ថិតនៅតំបន់ជាយក្រុង ឬបន្ទប់ខុនដូមួយនៅក្នុងទីក្រុង ដែលស្ថិតក្នុងគម្រោងការអភិវឌ្ឍថ្មីក៏ដោយ ក៏ជម្រើសទាំងនេះហាក់ល្អប្រសើរសម្រាប់អ្នកដែលមានមធ្យោបាយច្រើនជាជាង អ្នកទិញផ្ទះលើកដំបូងធម្មតា។

សម្រាប់អ្នកទិញជាលើកដំបូងភាគច្រើន គុណសម្បត្តិនៃការទិញផ្ទះស្រាប់ខាងក្រោមនេះ ប្រហែលជាអាចឲ្យគេយល់បានច្រើនជាង ៖

ដោយសារតែផ្ទះត្រូវបានសាងសង់ឡើងរួចហើយ ដូចនេះ អ្នកអាចផ្លាស់ចូលទៅរស់នៅបានយ៉ាងលឿនជាងការទិញផ្ទះដែលស្ថិតនៅក្នុងគម្រោងនៅឡើយ។ អ្នកអាចត្រូវចំណាយពេលមួយឆ្នាំ ឬច្រើនជាងនេះ

សម្រាប់ឲ្យផ្ទះមួយត្រូវបានសាងសង់ ប្រសិនបើអ្នកទិញនៅក្នុងគម្រោងអភិវឌ្ឍថ្មី ឬផ្ទះក្នុងគម្រោងបូរី។

ផ្ទះស្រាប់ច្រើនមានពេលវេលាសម្រាប់ការបន្ថែមធ្វើឲ្យប្រសើរ ដូច្នេះវាទំនងជានឹងមានលក្ខណៈល្អច្រើនបន្ថែមទៀត ចំណែកផ្ទះក្នុងគម្រោងវិញហាក់មានច្រើនប្រភេទ។ ផ្ទះដែលសាងសង់ស្រាប់អាចឲ្យអ្នកទិញយល់ដឹងច្រើនជាពិសេសព័ត៌មានលំអិតពីហិរញ្ញវត្ថុ ដូច្នេះពួកគេមានការប្រថុយប្រថានតិច និងអាចដឹងច្បាស់ពីតម្លៃដែលអាចទទួលបានពេលដែលលក់បន្ត។

ម្យ៉ាងទៀតដោយហេតុថា ទីតាំងសំខាន់បំផុតរបស់ទីក្រុងនានាច្រើនតែមានការអភិវឌ្ឍមុន ដូចនេះហើយផ្ទះស្រាប់ក៏ច្រើនតែមានទីតាំងល្អប្រសើរជាងផ្ទះក្នុងគម្រោងដែរ។

ចំណុចវិជ្ជមានសំខាន់ៗរបស់ផ្ទះគម្រោងដែលអ្នកគួរតែដឹងមុនពេលធ្វើការសម្រេចចិត្តណាមួយ ៖

វាអាចផ្តល់ឲ្យអ្នកនូវពេលវេលាបន្ថែមទៀតដើម្បីសន្សំលុយសម្រាប់ដាក់ប្រាក់កក់ ខណៈពេលដែលផ្ទះកំពុងស្ថិតនៅក្រោមការសាងសង់នៅឡើយ។

ផ្ទះនេះអាចជាប់គាំងក្នុងតម្លៃមួយក្នុងពេលឥឡូវនេះ ប៉ុន្តែអាចផ្តល់ឲ្យអ្នកនូវការចំណេញវិញយ៉ាងសាកសមនៅពេលក្រោយក្នុងពេលដ៏ខ្លី ប្រសិនបើតម្លៃល្អជាងមុន។

ផ្ទះថ្មីជាធម្មតាទាមទារការថែរក្សាតិចជាងផ្ទះចាស់ ដែលនេះអាចជួយប៉ះប៉ូវវិញនូវតម្លៃទិញផ្ទះដែលខ្ពស់នៅពេលអ្នកទិញដំបូង។

ប៉ុន្តែខ្ញុំពិតជាស្រលាញ់ផ្ទះក្នុងផែនការអភិវឌ្ឍន៍ថ្មី។ ហេតុអ្វី?

ដឹងពីហានិភ័យនេះ ៖

ជាដំបូងអ្នកត្រូវដឹងថាវាមានហានិភ័យច្រើននៅក្នុងការទិញផ្ទះក្នុងគម្រោងការអភិវឌ្ឍថ្មី។ ឧទាហរណ៍ ផ្ទះដែលបានបញ្ចប់ការសាងសង់ អាចនឹងមិនដូចគ្នានឹងអ្វីដែលគម្រោងបានបង្ហាញអ្នក ហើយពេលខ្លះអាចមានករណីធ្ងន់ធ្ងរខ្លាំង ដោយអ្វីៗអាចខុសខ្លាំងណាស់ពីអ្វីដែលអ្នកចង់បាន ឬក៏ផ្ទះមិនត្រូវបានសាងសង់ឡើងជាដើម។ អ្នកត្រូវធ្វើសិក្សា និងពិនិត្យមើលក្រុមហ៊ុនដែលធ្វើគម្រោងនេះឲ្យបានច្បាស់ល្អ ហើយនេះមិនមែនជារឿងមិនល្អនោះទេ ដែលអ្នកធ្វើបែបនេះ។ ប្រសិនបើអ្នកកំពុងពិចារណាទិញផ្ទះនៅក្នុងគម្រោងថ្មីមួយ អ្នកត្រូវដឹងឲ្យច្បាស់ និងមានការប្រុងប្រយ័ត្នថា ការផ្តល់អត្ថប្រយោជន៍បន្ថែមដោយឥតគិតថ្លៃ ដូចជា រថយន្ត ឬដំណើរកម្សាន្តវិស្សមកាល គឺតាមពិតទៅមិនមែនផ្តល់ដោយឥតគិតថ្លៃនោះទេ វាអាចត្រូវបានគិតបន្ថែមលើតម្លៃផ្ទះតាមវិធីណាមួយ។

ពិនិត្យមើលឲ្យបានច្រើនកន្លែងសិន៖

ប្រសិនបើអ្នកអភិវឌ្ឍន៍បានបញ្ចប់ការងារផ្សេងទៀតដូចជា មានផ្ទះបូរីដែលសាងសង់រួចស្រាប់ ឬខុនដូរួចហើយ អ្នកអាចពិនិត្យមើលគំរូទាំងនោះជាមុន ហើយត្រូវប្រាកដថាអ្នកបានអាននូវអ្វីគ្រប់យ៉ាងដែលចាំបាច់ដោយប្រុងប្រយ័ត្នបំផុត។ ប្រសិនបើមានអ្វីល្អជ្រុលហាក់លើសពីការពិត អ្នកត្រូវសួរសំណួរបន្ថែម និងស្នើសុំភស្តុតាងសមហេតុផលដែលគាំទ្រការអះអាងនោះ។ ជាទូទៅ វានឹងល្អប្រសើរសម្រាប់អ្នក ប្រសិនបើមានគំរូស្រាប់ដែលបានសាងសង់រួចទៅហើយ ព្រោះវាអាចឲ្យអ្នកគិតបានច្រើនថាកន្លែងនេះនឹងមានលក្ខណៈបែបណាក្នុងសភាពជាក់ស្តែង។ ប្រសិនបើអ្នកមិនមានបទពិសោធន៍ច្រើនក្នុងផ្នែកអចលនទ្រព្យ នោះខិត្តប័ណ្ណអាចមានលក្ខណៈបញ្ឆោតអ្នកខ្លាំងទាំងដែលមិនមានបំណងបោកបញ្ឆោតអ្នក។ វាគឺជាការងាយស្រួលខ្លាំងក្នុងការស្រមៃគិតពីអ្វីដែលអ្នកចង់គិតដល់ ដោយគ្មានការយល់ដឹងយ៉ាងច្បាស់ថាការពិពណ៌នាលក្ខណៈនោះមានន័យបែបណា។ អ្នកត្រូវធ្វើការប្រៀបធៀបតម្លៃផ្ទះដែលអ្នកចង់ទិញនឹងតម្លៃផ្ទះដែលមានស្រាប់នៅកន្លែងផ្សេងទៀតនៅក្នុងសង្កាត់ជាមួយគ្នា ព្រោះវានឹងជួយឲ្យអ្នកអាចដឹងថាវាមានតម្លៃសមរម្យឬទេ។

មានមេធាវី ៖

ជាមួយគ្នានឹងចំណុចខាងលើ អ្នកក៏ត្រូវមានមេធាវីដែលមានជំនាញផ្នែកអចលនទ្រព្យមួយ ដែលដឹងពីច្បាប់ក្នុងប្រទេសកម្ពុជា និងការអនុវត្តន៍ក្នុងទីផ្សារកម្ពុជាយ៉ាងច្បាស់។ នេះគឺជាការការពារល្អបំផុតមួយសម្រាប់អ្នក ហើយមេធាវីនេះនឹងក្លាយជាមនុស្សម្នាក់ដែលធ្វើការដោយផ្ទាល់សម្រាប់អ្នក ហើយនឹងមិនមានបញ្ហាទំនាស់ផលប្រយោជន៍នោះទេ។ អ្នកដែលមានជាប់ពាក់ព័ន្ធនឹងនៅក្នុងដំណើរការនេះ នឹងទទួលរងនូវឥទ្ធិពលនៃផលប្រយោជន៍ផ្ទាល់ខ្លួនក្នុងការលើកឡើងរបស់ខ្លួន ដោយពួកគេប្រហែលជាមិនបានសូម្បីតែដឹងថាពួកគេកំពុងនិយាយអ្វីដែលមិនមែនមានប្រយោជន៍ និងមានភាពត្រឹមត្រូវដូចដែលអ្នកចង់ឲ្យគេធ្វើ។

ការពិនិត្យអង្កេតលើផលិតផលចុងក្រោយ:

បន្ទាប់ពីផ្ទះក្នុងគម្រោងអភិវឌ្ឍន៍ថ្មីនោះត្រូវបានកសាងឡើងហើយ អ្នកត្រូវតែធ្វើការពិនិត្យអង្កេតវាជាមុនសិន មុនពេលដែលចូលទៅរស់នៅ ដោយក្នុងនោះអ្នកអាចជួលអ្នកត្រួតពិនិត្យអគារម្នាក់ ដើម្បីធ្វើការនេះសម្រាប់អ្នក។ ប្រសិនបើមានអ្វីខុសឆ្គងកើតឡើង អ្នកត្រូវចាប់វាឲ្យបានទាន់ពេលវេលា និងការព្យាយាមរកដំណោះស្រាយ។ ចូរកុំរង់ចាំរហូតដល់ពេលដែលអ្នកបង់ថវិកា និងផ្លាស់ប្តូរចូលទៅរស់នៅក្នុងផ្ទះ ព្រោះថាវាជាអាចសញ្ញាបង្ហាញពីការត្រួតពិនិត្យសំខាន់ចុងក្រោយនេះរបស់អ្នកដើម្បីទទួលយកផ្ទះ។

The post ជម្រើសរវាងផ្ទះមានស្រាប់ និងផ្ទះក្នុងគម្រោងអភិវឌ្ឍន៍ថ្មី: តើជម្រើសមួយណាល្អបំផុត appeared first on Construction & Property News.

សម្រាប់​ក្រុមហ៊ុន ម៉េង ឡេង​អ៊ីវ ខូ​អិ​ល​ធី​ឌី សមាហរណកម្ម​សេដ្ឋកិច្ច​ក្នុង​តំបន់​នឹង​មិនមាន​ឥទ្ធិពល​សំខាន់​ណាមួយ​លើ​អាជីវកម្ម​នោះទេ។ ជាក្រុមហ៊ុនជំនាញនាំមុខគេក្នុងប្រទេស​កម្ពុជាក្នុង​ការផ្គត់ផ្គង់​ឧបករណ៍អគ្គិសនី ឧបករណ៍​កសិកម្ម និង​សម្ភារ​វិស្វកម្ម​ប្រកបដោយ​គុណភាព ដែលបច្ចុប្បន្ន​ធ្វើការ​ចែកចាយ​ផ្តាច់មុខ​នូវ​ផលិតផល​ជាង ១០ ម៉ាក និង​ចែកចាយ​មិន​ផ្តាច់មុខ ៥ ម៉ាក បន្ទាប់ពី​ក្រុមហ៊ុន​បាន​បើក​ដំណើរការ​ដំបូង​កាលពី​ជាង ២០ឆ្នាំមុន។ នៅក្នុង​បរិយាកាស​ប្រកួតប្រជែង​កាន់តែ​ច្រើនឡើង​នាពេល​បច្ចុប្បន្ននេះ ក្រុមហ៊ុន​មាន​យុទ្ធសាស្ត្រ​ក្នុងការ​ផ្លាស់ប្តូរ​ខ្លួន​ពី​អ្នក​ចែកចាយ​ទៅជា​អ្នក​ផលិត​ដំបូង​គេ​នូវ​ផលិតផល​ដែល​ខ្លួន​ចែកចាយ​នៅលើ​ទីផ្សារ​កម្ពុជា។

លោក ម៉េង រស្មី នាយក​ក្រុមហ៊ុន ម៉េង ឡេង​អ៊ីវ ខូ​អិ​ល​ធី​ឌី បានបង្ហាញ​អំពី​របៀប​ដែល​ក្រុមហ៊ុន​លោក​ត្រៀមខ្លួន​ដើម្បី​ពង្រឹង និង​ពង្រីក​អាជីវកម្ម​របស់ខ្លួន ព្រមទាំង​ដោះស្រាយ​បញ្ហា​ប្រឈម​នៃ​សហគមន៍​សេដ្ឋកិច្ច​អាស៊ាន​នៅក្នុង​បទ​សម្ភាស​មួយ​​ដូចខាងក្រោមជាមួយ​ទស្សនា​វ​ដ្តី​សំណង់ និង​អចលនទ្រព្យ៖

សំណួរ៖ បច្ចុប្បន្ន​អ្នកផ្គត់ផ្គង់​កាន់​តែមាន​ច្រើន ហើយ​ក៏មាន​ផលិតផល​ច្រើនឡើង​នៅលើ​ទីផ្សារ​ផងដែរ ដូចនេះ​តើ​លោក​បានធ្វើឱ្យ​ប្រសើរឡើង​នូវ​មធ្យោបាយ និង​ធនធាន​របស់លោក ដើម្បី​ដោះស្រាយ​ជាមួយនឹង​បញ្ហា​ប្រឈម​នេះ​ឬ​នៅ ហើយ​តើ​មានការ​ស្មាន​ទុកជាមុន​នូវ​ផលប៉ះពាល់​នៃ​សមាហរណកម្ម​តំបន់​យ៉ាងណាដែរ?

ចម្លើយ៖ នៅក្នុង​ឆ្នាំនេះ យើង​បានជ្រើសរើស​ធនធានមនុស្ស​កាន់តែច្រើន ជាពិសេស​ក្រុម​ផ្នែក​លក់ ដើម្បី​ទៅ​ជួប​ជាមួយ​អតិថិជននៅតាម​ការដ្ឋាន​សាងសង់ រោងចក្រ និង​ឃ្លាំង​ជាដើម ហើយ​ឥឡូវ​នេះ យើង​ក៏មាន​ក្រុម​ចែកចាយ និង​ផ្សព្វផ្សាយ​ផងដែរ។ ក្រៅពីនេះ ការិយាល័យ​តាំង​បង្ហាញ​របស់​យើង​នៅ​ជា​ន់ទី ៣ ដែល​បាន​បើក​ដំណើរការ​កាលពី​ថ្ងៃទី ២៦ ខែកុម្ភៈ គឺ​មិន​ត្រឹមតែ​ធ្វើ​ឲ្យ​កេរ្តិ៍ឈ្មោះ​ក្រុមហ៊ុន​កាន់តែ​ប្រសើរឡើង​ប៉ុណ្ណោះ​ទេ ប៉ុន្តែ​ថែមទាំង​ជា​កន្លែង​ដែល​អាច​ឲ្យ​អតិថិជន និង​អ្នក​ចូល​ទស្សនា​បានទទួល​នូវ​បទពិសោធន៍​ទាក់ទង​នឹង​ការបង្កើត​ថ្មី​ផងដែរ។

សំណួរ៖ ដើម្បី​រក្សា​ភាព​ឈានមុខ​គេ​របស់​ក្រុមហ៊ុន​នៅក្នុង​ទីផ្សារ តើ​លោក​បាន​ពង្រីក និង​រៀបចំ​រចនាសម្ព័ន្ធ​បណ្តាញ​នៃ​ការលក់​របស់លោក​នៅ​ទូទាំងប្រទេស​របៀប​ណា?

ចម្លើយ៖ ក្រុមហ៊ុន ម៉េង ឡេង​អ៊ីវ បាន​អនុវត្ត​គ្រប់​ប្រភេទ​នៃ​បណ្តាញ​លក់។ ក្រៅពី​ការពឹង​ផ្អែកលើ​ការលក់ដុំ និង​អ្នក​លក់រាយ​នៅតាម​បណ្តា​ហាង​លក់រាយ​ជាង ៥០០ នៅ​ទូទាំងប្រទេស យើង​ក៏មាន​ក្រុម​លក់​របស់​យើង​ដែល​តែងតែ​ចុះ​ទៅតាម​តំបន់​ជា​រៀងរាល់ខែ ដើម្បី​ធានាថា​យើង​មិន​ដើរ​ក្រោយ​កំណើន​ទីផ្សារ និង​ទំនោរ​ទីផ្សារ​នោះទេ។ យើង​ធ្វើការ​ផ្គត់ផ្គង់​ផលិតផល​ដល់​អ្នកលក់​ដុំ​របស់​យើង ហើយ​ពួកគេ​បាន​ផ្គត់ផ្គង់​ទៅឲ្យ​អ្នក​លក់រាយ​ដែលជា​ដៃគូ​របស់​ពួកគេ​បន្តទៀត។ ទោះយ៉ាងណា​អ្នកលក់​រាយ​អាច​ទទួលយក​ផលិតផល​ដោយផ្ទាល់​ពី​ការិយាល័យ​កណ្តាល ឬ​ពី​សាខា​ដែល​នៅ​ជិត​នៅក្នុង​តម្លៃ​ដូចគ្នា។ នៅក្នុង​ផ្នែក​មួយ​នៃ​យុទ្ធនាការ​ទីផ្សារ​របស់​យើង យើង​ក៏បាន​លើកទឹកចិត្ត​ដៃគូ​របស់​យើង តាមរយៈ​ការធ្វើដំណើរ​កម្សាន្ត​ទៅ​បរទេស និង​ការផ្តល់​រង្វាន់​លើកទឹកចិត្ត​ជា​រៀងរាល់ឆ្នាំ​ផងដែរ។

សំណួរ៖ ក្រុមហ៊ុន​លោក​ក៏​ធ្វើ​ការផលិត​នូវ​ផលិតផល​ជា​ម៉ាក​របស់ខ្លួន​ដែរ ដូចនេះ​តើ​លោក​មាន​យុទ្ធសាស្ត្រ​បែបណា​សម្រាប់​ផលិតផល​ទាំងនេះ​នៅក្នុង​ប្រទេស​កម្ពុជា និង​នៅក្នុង​តំបន់?

ចម្លើយ៖ យើង​មាន​គម្រោង​ក្នុងការ​បង្កើត​រោងចក្រ​ផលិត​នៅទីនេះ ដើម្បី​ទទួលបាន​ប្រយោជន៍​ពី​ការប្រកួតប្រជែង​មុន​ដៃគូ​ប្រជែង​របស់​យើង នៅក្នុង​រយៈពេល​ប្រហែលជា​បី​ឆ្នាំ​ខាងមុខ។ រោងចក្រ​នេះ​នឹង​ចាប់ផ្តើម​ដំណើរការជា​រោងចក្រ​តម្លើង​ផលិតផល​របស់​យើង​ជាមុនសិន មុន​ធ្វើ​ឲ្យ​វា​ក្លាយជា​រោងចក្រ​ផលិត​ពេញលេញ។

សំណួរ៖ តើ​លោក​អាច​រៀបរាប់​ពី​តម្រូវការ​ឧបករណ៍ប្រើប្រាស់​ថាមពល​អគ្គិសនី​នៅក្នុង​ទីផ្សារ​បច្ចុប្បន្ន​បានទេហើយ​អតិថិជន​ណាខ្លះ​ដែល​ត្រូវ​ការទិញ​ឧបករណ៍​ទាំងនេះ? តើ​ជា​អ្នក​លក់រាយអ្នកធ្វើ​គម្រោង ឬក៏​អ្នកទិញ​សម្រាប់​ប្រើប្រាស់​ផ្ទាល់ខ្លួន?

ចម្លើយ៖ កាលពីមុន​អគ្គិសនី​មិនមាន​សម្រាប់​ប្រើប្រាស់​យ៉ាង​ទូលំទូលាយ​នោះទេ ប៉ុន្តែ​បច្ចុប្បន្ននេះ គ្រប់គ្នា​អាច​ប្រើប្រាស់​អគ្គិសនី​បាន​ប្រសើរ​ជាង​មុន ដែល​នេះ​ក៏​មានន័យថា មនុស្ស​ចង់​ធ្វើ​ការងារ​ឲ្យ​បាន​លឿន​ជាង​មុន​ដែរ។ កត្តា​នេះហើយ​ដែល​ជំរុញ​ឱ្យ​តម្រូវការ​ឧបករណ៍ប្រើប្រាស់​ថាមពល​អគ្គិសនី​កាន់តែ​ច្រើនជាង​មុន។ សម្រាប់​ពួកយើង តម្រូវការធំៗគឺ​មកពី​អ្នក​លក់ដុំ និង​អ្នក​លក់រាយ​របស់​យើង ដោយសារតែ​យើង​ផ្តោតលើ​ការផ្គត់ផ្គង់​តម្រូវការ​នៅ​ទូទាំងប្រទេស។ តម្រូវការ​ពី​គម្រោងការ​សាងសង់ គឺជា​មូលដ្ឋាន​អតិថិជន​ធំ​ទី​ពីរ​សម្រាប់​យើង។ ក្នុងចំណោម​ផលិតផល​ជាច្រើន​របស់​យើង ឧបករណ៍ប្រើប្រាស់​ថាមពល​អគ្គិសនី សម្ភារ​កសិកម្ម គឺជា​ផលិតផល​ចម្បង​ដែល​ជំរុញ​ការរីកចំរើន​របស់​យើង។

សំណួរ៖ តើ​បញ្ហា​ប្រឈម និង​ឱកាស​អ្វីខ្លះ ដែល​លោក​មើលឃើញ​ចំពោះ​វិស័យ​ផ្គត់ផ្គង់​សំណង់​នៅក្នុង​សហគមន៍​សេដ្ឋកិច្ច​អាស៊ាន (AEC)?

ការបើក​នូវ​សមាហរណកម្ម​ទីផ្សារ គឺជា​កម្លាំងចលករ​មួយ​ជំរុញឲ្យមាន​លំហូរ​នៃ​ការវិនិយោគ​កាន់តែច្រើន​នៅក្នុង វិស័យ​សំណង់ និង​កសិកម្ម​នៅ​ប្រទេស​កម្ពុជា ហើយ​សម្រាប់​យើង នេះ​គឺ​ពិតជា​ឱកាស​យ៉ាង​ធំ​មួយ។ ប៉ុន្តែ​ស្របពេល​ជាមួយគ្នា យើង​ក៏ត្រូវ​ប្រឈមមុខ​នឹង​ការប្រកួតប្រជែង​យ៉ាងខ្លាំង​នៅពេល​ដែលមាន​ម៉ាក​ផលិតផល​កាន់តែ​ច្រើនឡើង​នៅលើ​ទីផ្សារ ជាពិសេស​ការប្រកួតប្រជែង​ខាង​តម្លៃ និង​សេវាកម្ម។

សំណួរ៖ ការធ្វើសមាហរណកម្ម​អាស៊ាន​បាន​ដកចេញ​នូវ​ពន្ធ​ពី​ទំនិញ​នៅ​ទូទាំង​តំបន់។ តើ​វា​គឺជា​ការព្រួយបារម្ភ​មួយ​សម្រាប់​លោក​ទេ នៅពេលដែល​ផលិតផល​ដែលជា​គូប្រជែង​របស់លោក​ដែល​មកពី​ប្រទេស​សមាជិក​អាស៊ាន អាច​ចូលមកក្នុង​ប្រទេស​កម្ពុ​ជា​នៅក្នុង​តម្លៃ​មួយ​ថោក​ជាង?

ចម្លើយ៖ វា​មិនមែនជា​បញ្ហា​ធំ​មួយ​សម្រាប់​អាជីវកម្ម​របស់ខ្ញុំ​នោះទេ នៅពេលដែល​កម្ពុជា​លុបចោល​ការយកពន្ធ​នាំចូល​ទាំងអស់​សម្រាប់​ទំនិញ​ពី​អាស៊ាន​នៅ​ឆ្នាំ២០១៨ ប៉ុន្តែ​យើង​ប្រឈមមុខ​នឹង​ការលំបាក​ត្រង់​នាយកដ្ឋាន​ពន្ធ មាន​ហេតុផល​មួយចំនួន បាន​បដិសេធ​ប្រព័ន្ធ​សុខដុម​នីយកម្មសម្រាប់​កូដ​នៃ​ផលិតផល​នាំចូល​របស់​យើង ដែល​យើង​បានដាក់​ពាក្យ​សម្រាប់​ការលើកលែង​ពន្ធ។ វា​នឹង​ល្អ ប្រសិនបើ​ពន្ធ​លើ​ការ​នាំចូល​ទាំងអស់​ត្រូវបាន​លុបចោល ដូច្នេះ​យើង​នឹងមិន​ចាំបាច់​ខ្វល់​អំពី​រឿង​ទាំងនេះ​ទៀត នៅពេលដែល​អាជីវកម្ម​ទាំងអស់​ត្រូវ​អនុវត្តតាម​ច្បាប់​ដូចគ្នានេះ។ រហូតមកដល់​ពេលនេះ យើង​នាំចូល​ផលិតផល​ពី​អ្នកផ្គត់ផ្គង់​នៅ​ប្រទេស​ថៃ ម៉ាឡេស៊ី សិង្ហ​បុរី ចិន និង​ជប៉ុន។ ខ្ញុំ​បានកត់សម្គាល់​ឃើញថា រដ្ឋាភិបាល​បាន​លុបចោល​នូវ​ពន្ធអាករ​លើ​តម្លៃបន្ថែម និង​ពន្ធ​លើ​ការ​នាំចូល ចំពោះ​ផលិតផល និង​សម្ភារៈ​ជាច្រើន ដូចជា ដែក និង​ស៊ីម៉ងត៍ ប៉ុន្តែ​តាមពិតទៅ ផលិតផល​មួយចំនួន​នៅតែ​ត្រូវ​បង់ពន្ធ​ទាំងនេះ ទោះបីជា​ផលិតផល​ទាំងនេះ​ស្ថិតនៅក្រោម​ទម្រង់ D និង​ E នៃ​នីតិវិធី​គយ​ក៏ដោយ។ ខ្ញុំ​សង្ឃឹមថា​រដ្ឋាភិបាល​នឹង​កាត់បន្ថយ​ពន្ធចំពោះ​ឧបករណ៍ និង​សម្ភារ​បរិក្ខារ​ដែល​បម្រើ​ឲ្យ​វិស័យ​សំណង់ និង​កសិកម្ម ដែល​បច្ចុប្បន្ន​នោះ​គឺ​ស្ថិតក្នុង​អត្រាពន្ធ​ប្រហែល ៥ ភាគរយ។ ខ្ញុំ​បានស្នើ​សុំ​អាជ្ញាធរ​ដើម្បី​ជួយ​សម្រួល​ដល់​នីតិវិធី​ទូទាត់​ពន្ធ ព្រមទាំង​ហាមឃាត់​យ៉ាងខ្លាំង​ចំពោះ​ការ​ចែកចាយ​ផលិតផល​ដែល​គ្មាន​ប្រភព​ផ្គត់ផ្គង់​ច្បាស់លាស់។

The post ពីអ្នក​ផ្គត់ផ្គង់ទៅអ​្នក​ផលិត៖ ទស្សនៈវិស័យអ្នកដឹកនាំទីផ្សារ appeared first on Construction & Property News.